د افغانستان د کرېکټ ملي لوبډلې له هند سره د درېو شل اوریزو لوبلړۍ دوه لوبې بایللې او د لوبلړۍ درېیمه سیالۍ یې نن چهارشنبه د (مرغومي ۲۷مه) د کابل په وخت ماښام شپږ بجې د هند بنګلور ښار په چینای سوامي کرېکټ لوبغالي کې ترسره کیږي.
د شل اوریزو لوبو نړیوال جام وړاندې دا لوبلړۍ د دواړو هیوادونو لپاره خورا ګټوره بلل کیږي، ځکه دا ډول لوبلړیو ته په کتو د نړیوال جام لپاره لوبډله ټاکل کیږي.
د افغانستان او هند تر منځ د لوبلړۍ تېرو دوو لوبو ته په کتو سره افغان لوبډلې د پام وړ لوبې ترسره نه کړې.
له دغو درې شل اوریزو نړیوالو لوبو څخه په تېرو دوو لوبو کې د افغان لوبډلې پیلیزو توپ وهونکو رحمان الله ګربز او ابراهیم ځدراڼ د کمو منډو په جوړیدو او ژر سوځېدو سره ښه لاسته راوړنه نه لرله.
دغه لوبلړۍ د راشد خان په نشتوالي کې د ابراهیم ځدراڼ په لوبډلمشرۍ تر سره کیږي.
د کرېکټ څارونکي وايي، لا هم افغان لوبډلې د پیلیزو توپ وهونکو جوړه او د لوبډلې د منځنۍ لیکې توپ وهونکو په ټاکنه او لوبغالي ته د راښکته کېدو ستونزه نه ده هواره شوې.
له هندوستان سره د افغان ملي لوبډلې د درې شل اوریزو لوبو لوبلړۍ داسې مهال تر سره کیږي چې، د ۲۰۲۴ کال د شل اوریزو لوبو نړیوال جام لوبې د ویسټ انډیز او امریکا په کوربه توب د جون میاشتې په لومړۍ نېټه ترسره کیږي.
