د افغانستان کرېکټ بورډ اداره وايي، افغان ملي لوبډله د هندوستان ملي لوبډلې پر وړاندې د دریو شل اوریزو سیالیو لوبلړۍ دویمه سیالۍ نن یکشنبه د (مرغومي ۲۴مه) د افغانستان پر وخت ماښام شپږ بجې ترسره کیږي. د دریو شل اوریزو لوبلړۍ دغه دویمه لوبه به د هندوستان په انډور ښار کې ترسره کیږي.
د افغانستان او هندوستان تر منځ د یادې شل اوریزې لوبلړۍ لومړۍ لوبه دوه ورځې وړاندې د هندوستان ملي لوبډلې له افغان لوبډلې څخه د شپږ ویکیټو په توپیر وګټله.
د افغانستان کرېکټ بورډ پر خپلو ټولنیزو پاڼو لیکلي دي، چې افغان ملي لوبډله د هندوستان انډور ښار ته رسیدلې او د نننۍ لوبې لپاره یې تمرینات پیل کړي دي.
د هندوستان او افغانستان ملي لوبډلو تر منځ د دریو شل اوریزو لوبو دغه لوبلړۍ د افغانستان د شل اوریزې کرېکټ لوبډلې د لوبډلمشر راشدخان په نه شتون کې ترسره کیږي.
هندي رسنیو ویلي چې د افغانستان او هندوستان تر منځ د شل اوریزو لوبو په لومړۍ لوبه کې د هندوستان د ملي لوبډلې غړی ویرات کهولي د شخصي بوختیاو له امله په لوبډله کې ګډون نه درلود، خو نوموړی چمتو دی چې په نننۍ لوبه کې د افغانستان په وړاندې د سیالۍ ډګر ته راشي.
هندي رسنیو ویلي چې، د یادې لوبلړۍ په لومړی سیالۍ کې د افغانستان په لوبډله کې د ورو توپ اچوونکو نه شتون د دې لامل شو چې هندۍ لوبډله پر افغان لوبډله برلاسې شي.
