د روغتیا نړۍوال سازمان د یوه راپور په خپرولو سره د ۲۰۲۳ کال د اکټوبر له اوومې تر پنخلسمې نېټې پورې په هرات ولایت کې د زلزلو لړۍ ته په اشارې سره وویل، چې دغو زلزلو په ۶ ولسوالیو کې له ۲۷۵۰۰۰ څخه ډېر کسان اغېزمن کړل.
د روغتیا نړۍوال سازمان د افغانستان د بشري مرستو د صندوق په مالي مرسته د هرات په څلورو ولسوالیو کې ۸ روغتیایی مرکزونه جوړ کړي چې زیانمنو ټولنو ته روغتیایی خدمتونه وړاندې کړي.
د راپور له مخې؛ په دغو زلزلو کې کابو ۴۰ روغتیایي مرکزونه زیانمن شوي دي.
د راپورونو له مخې؛ په دې پېښه کې ۱۳۸۴ مړه، ۲۱۰۰ نور ټپيان او شاوخوا ۱۰ زره کورونه له منځه ولاړل.
اوس سره له دې، چې له دغو زلزلو شاوخوا څلور میاشتې تېرې شوي؛ خو بیا هم په هرات کې زیانمنې کورنۍ د خوړو، د اوسېدو ځای او روغتیايي خدمتونو په څېر د ژوند لومړنیو امکاناتو ته د نه لاسرسي په اړه شکایت کوي.
د هرات له زلزلو وروسته د بېلابېلو هېوادونو او مرستندویه ادارو له خوا د نقدي مرستو ترڅنګ د درملو، خوړو او بېلابېلو نورو اړینو توکو مرسته وشوه؛ خو بیا هم دغه زیانمنې کورنۍ سخت ژمی تېروي.
