د طالبانو مشر هبت الله اخوندزاده ته منسوب په یوه نوي غږیز پیغام کې د دې ډلې پر امرونو هر ډول عامه نیوکې منع کړې دي. نوموړي د خپلې ډلې له ځواکونو وغوښتل چې د ورته مخالفتونو مخه ونیسي.
ملا هبت الله ټینګار وکړ، چې په دې ډله کې د اختلافاتو رامنځته کول به د طالبانو د نظام د سقوط لامل شي.
هغه وويل، چې د طالبانو د غړو او دې ډلې ته د وفادارو ملايانو تر منځ به د اختلاف مساله راپورته کېږي؛ خو بايد له پامه ونه غورځول شي.
د دې وینا د نېټې او ځای په اړه د تایید وړ معلومات نه شته؛ خو د وینا غږیز بڼه د طالبانو تر کنټرول لاندې د ملي راډیو او ټلویزیون مرستیال هدایت الله هدایت پر خپلې ایکس پاڼه خپور کړی او ادعا یې کړې، چې دا وینا د چهارشنبې په ورځ (د وږي ۲۷ مه) شوې ده.
همدا راز د دې وینا ځینې برخې په افغانستان کې دننه فعالو رسنیو هم خپرې کړې دي.
د طالبانو مشر وویل: "کله چې اسلامي امارت [طالبان] یو حکم صادروي، هیڅوک یې باید له پامه ونه غورځوي او که څوک یې مخالفت کوي، هغه ته باید اجازه ورنه کړل شي."
ملا هبت الله د طالبانو له غړو وغوښتل چې د امارت د فرمانونو او حکمونو د مثبتو اړخونو په اړه خبرې وکړي؛ خو منفي اړخونه یې یاد نه کړي، ځکه دښمن ترې ناوړه ګټه پورته کوي.
د طالبانو د مشر په دې وینا کې د طالبانو پر سیاستونو د خلکو نیوکې هم منع شوې دي.
هغه وویل:" که تاسو پر امارت کوم اعتراض لرئ، هڅه وکړئ چې د امارت عیبونه په خلکو کې بیان نه کړئ."
تر دې مخکې هم د طالبانو د لوړ پوړو مشرانو ترمنځ د دې ډلې د مشر د تګلارو پر سر د اختلاف راپورونه ورکړل شوي وو.
د نجونو پر زده کړو د بندیز په شمول، چې د طالبانو د رژیم په منزوي کولو کې یې مرسته کړې ده، د طالبانو د یو شمېر لوړ پوړو غړو له خوا نیوکې راپورته شوې دي.
نوموړي ویلي، چې نړۍ په تعجب کې ده او فکر کوي، چې طالبان په جومات او مدرسو کې اوسي او هېڅ ډول امکانات نه لري او نړۍ هڅه کوي، چې د طالبانو ذهیت خراب کړي.
هغه زیاته کړې: "خو د الله په اړه چې د طالب په زړه کې کوم احساس دی د بل هېچا په زړه کې نه شته، د عالمانو دا دنیا هم ښه ده او هغه دنیا هم".
هبت الله اخوندزاده په دې وینا کې په افغانستان کې له منتخب جمهوري حکومت څخه د لویدیځو هېوادونو د ملاتړ یادونه هم وکړه.
هغه وویل: "نړۍ هڅه کوي چې د شریعت په اړه د خلکو ذهنیت خراب کړي او دوی ته د ډېموکراسۍ تبلیغ کوي؛ خو تاسو ورته د شریعت په اړه ووایاست؛ ځکه په تېرو سلو کلونو کې غربیانو د خلکو ذهنیت خراب کړی دی.»
د طالبانو مشر ټینګار وکړ، چې د طالبانو هر امر او کار د افغانانو په ګټه دی.
نوموړي په خپلې وینا کې د غزې جګړې ته په اشارې د فلسطین د خلکو د بریا دعا هم کړې او ویلي یې دي، چې دوی به بریالي کیږي.
