د طالبانو د کلیو او بیا رغونې وزارت وايي، د واخان له لارې د چین او افغانستان نښلوونکی سړک ۴۰ کیلومتره جوړ او پاتې څه کم لس کیلومتره به یې هم ژر جوړ شي. خو د بدخشان لپاره د طالبانو والي نږدې لس ورځې مخکې ویلي و، د کوچني پامیر سړک په جوړیدو افغانستان رسما له چین سره ونښلول شو.
خو د دې ډلې د کلیو او بیارغونې وزارت د دفتر ریس مولوي میرزا محمد شکیب پرون د خپلو لاسته راوړنو غونډه کې وویل، چې دا سړک لا هم نه دی بشپړ شوی.
د هغه په خبره، د بدخشان په واخان کې له بزهای ګنبد سیمې د چین تر پولې له ۴۹.۷ کیلومتره سړک څخه ۴۰ کیلومتره جوړ شوی دی.
د هغه په خبره، د چین تر صفري نقطې د پاتې څه کم لس کیلومتره سړک چارې به هم ژر بشپړې شي.
لا هم مالومه نه ده چې د طالبانو له لوري که دا سړک بشپړېږي هم، د چین له خوا د سړک تېرولو او له دې لارې د سوداګرۍ پیلولو کوم تدابیر نیول شوي او که نه.
له افغانستان سره د چین د مخامخ نښلېدو لپاره د واخان لارې جوړېدل د افغان جمهوریت لویه هیله هم وه او طالبان هم چې واکمن شوي بیا بیا له بېجنینګ ورته غوښتنه کوي.
طالبانو له چینايي چارواکو سره په لیدنو کې له بیا بیا غوښتنو وروسته د دې سړک د جوړولو چارې د تېر میلادي کال په سپټمبر میاشت کې پیل کړې
د طالبانو د کلیو پراختیا وزارت وایي، د دې سړک پر جوړیدو ۳۶۹ میلیونه افغانۍ لګښت راځي چې له کورنۍ بودجې ورکول کیږي.
