د ایران د بهرنیو چارو وزارت د سوېلي اسیا برخې مشر وايي، راتلونکې اونۍ د افغانستان پلازمېنه کابل کې د دغه هېواد د ګاونډیانو غونډه جوړېږي. رسول موسوي زیاتوي، دا غونډه په افغانستان کې د سولې، ټیکاو او د خلکو د پرمختګ او د سیمې د امنیت لپاره د افغانستان د ګاونډیانو ځانګړې توجو ښيي.
ښاغلي موسوي نن خپل اېکس کې ویلي چې ایران، پاکستان، روسیه او چین به هرو مرو دې غونډه کې ګډون وکړي.
نوموړي په دې غونډه کې د نورو هېوادونو د شرکت په هکله څه نه دي ویلي.
تر دې مخکې د افغانستان لپاره د روسیې ځانګړي استازي هم ویلي و، چې روسیه، چین، ایران او پاکستان په نږدې راتلونکي کې د افغانستان په اړه غونډه کوي.
د ضمیر کابلوف په خبره، د دغې غونډې موخه په افغانستان کې د ټول ګډونه حکومت جوړول له نشهیي توکو او ترهګرۍ سره مبارزه ده.
د روسیې د بهرنیو چارو وزیر هم تېره اونۍ له طالبانو وغوښتل چې د پښتنو په ګډون ټولو قومونو ته خپل حکومت کې ځای ور کړي.
د طالبانو ویاند ذبیح الله مجاهد د سرګي لاوروف په غبرګون کې وویل، چې حکومت یې ټولګډونه دی او مسکو دې د افغانستان په کورنیو چارو کې لاسوهنه نه کوي.
خو د روسیې په ګډون نړیواله ټولنه په دې باور ده چې له طالبانو سره د هر قوم کسان له فکري پلوه طالبان دي او حکومت یې د قومونو سیاسي مشارکت نه لري.
ټولګډونه حکومت جوړول په دوحه تړون کې د طالبانو یو مهم شرط و او د نړیوالو په باور، د دې ژمنې نه پوره کېدل له طالبانو سره د نړۍ د تعامل او د دوی د حکومت په رسمیت پېژندلو لوی خنډ دي.
خو طالبان دا ډول څرګندونې دافغانستان په چارو کې لاسوهنه بولي او په مقابل کې له نورو هېوادونو سره د اړیکو پراخولو او تعامل زیاتولو لپاره غونډې کوي.
د طالبانو بهرنیو چارو وزیر امیر خان متقي پرون په کابل کې د لسو هېوادونو له استازو سره لیدنه کې هم د کابل او اړوند هېوادونو ترمنځ د تعامل ډېرېدو غوښتنه کړې وه.
په دې غونډه کې د چین، روسیې، ایران، پاکستان، ازبکستان، ترکمنستان، قزاقستان، هند، انډونیزیا او ترکیې استازو ګډون درلود.
