د ایران د بهرنیو چارو وزیر د پاکستان له لوی درستیز سره د سیمې د امنیت په اړه غږېدلی
د ایران د بهرنیو چارو وزیر حسین امیرعبداللهیان اسلام اباد ته د خپل سفر په ترڅ کې د پاکستان له لوی درستیز جنرال عاصم منیر سره وکتل.
د ایران د بهرنیو چارو وزیر حسین امیرعبداللهیان اسلام اباد ته د خپل سفر په ترڅ کې د پاکستان له لوی درستیز جنرال عاصم منیر سره وکتل.
د ایران دولتي خبري اژانس ایرنا د دوشنبې په ورځ (د سلواغې ۹مه) د یوه راپور په خپرولو سره ویلي، چې دواړو لورو د ایران او پاکستان ترمنځ د اړیکو، په سرحدي سیمه کې د سولې، ثبات او سوکالۍ په اړه خبرې کړي دي.
د راپور له مخې؛ د پاکستان لوی درستیز ځمکنۍ ساتنې ته پر درناوي ټینګار وکړ او دا یې د دولتونو تر منځ د اړیکو لپاره مهم بللی دی.
د ایران د بهرنیو چارو وزیر او د پاکستان لوی درستیز ترهګري د سیمې د هېوادونو لپاره ګډ ګواښ بللی دی او پر ګډې مبارزې یې ټینګار کوي.
دا په داسې حال کې ده، چې د ایران د بهرنیو چارو وزیر تر دې وړاندې له خپل پاکستاني سیال سره هم د دواړو هېوادونو د ترینګلو اړیکو په اړه خبرې وکړې.
د تهران او اسلام اباد اړیکې تر هغه وروسته ترینګلې شوې، چې ایران شاوخوا دوه اونۍ وړاندې د پاکستان په بلوچستان ایالت کې توغندیز بریدونه وکړل چې له امله یې یو شمیر بلوڅانو ته مرګژوبله واوښته او د پاکستان وسلوالو ځواکونو هم د ایران د سیستان بلوچستان پر سراوان ځوابیه توغندیز برید وکړ او ویې ویل چې بلوڅ بېلتونپال یې په نښه کړي دي.
