د اسراییل لومړي وزیر بنیامین نتنیاهو له حماس سره د یوې نوې موافقې ته د رسېدو د احتمال په اړه د ځینو ګومانونو په ځواب کې ټینګار وکړ، چې د غزې په تړانګه کې به پوځي عملیات د اسراییل د ټولو اهدافو تر پوره کېدو پورې دوام وکړي.
هغه د اسراییل د جګړې اهداف د حماس له منځه وړل، د یرغمل شویو بندیانو خوشې کول او په غزه کې د ټولو امنیتي خطرونو له منځه وړل په ګوته کړل.
نتنیاهو زیاته کړه: «موږ به د غزې له تړانګې څخه د اسراییل پوځ ونه باسو. موږ به زرګونه ترهګر خوشې نه کړو. له دې څخه هیڅ یو به نه وي. موږ به د بشپړې بریا کم هېڅ ترسره نه کړو."
په ورته وخت کې ملګرو ملتونو او د عربي اتحاد غړو هېوادونو پر اسراییل غږ کړی، چې په غزه کې دې اوربند ته زمینه برابره کړي.
ټاکل شوې، چې د مصر، قطر، امريکا او اسرایيل استازو په سيمه کې د اوربند د ټينګښت او د حماس له خوا د يرغمل شويو کسانو د خلاصون په اړه د خبرو اترو لپاره د فرانسې پلازمېنې پاريس ته سفر وکړي.
د طالبانو د بهرنیو چارو وزارت ویلی، چې د چین ولسمشر شي جین پینګ د طالبانو د سفیر او استازي په توګه د اسدالله بلال کریمي باورلیک منلی دی. بلال کریمي تر دې مخکې د ولسمشر پر ځای د چین د بهرنیو چارو وزارت د تشریفاتو رییس ته خپل باورلیک وړاندې کړی و.
د طالبانو د بهرنیو چارو وزارت ویاند عبدالقهار بلخي د سې شنبې په ورځ (د سلواغې ۱۰مه) په یوه خبرپاڼه کې لیکلي، چې د بلال کریمي باورلیک د ۴۱ نورو هېوادونو د سفیرانو په ګډون د یو لړ ځانګړو مراسمو په ترڅ کې شي جین پینګ ته وړاندې شو.
د اکټوبر په میاشت کې د طالبانو د بهرنیو چارو وزارت اعلان وکړ، چې چین په بیجینګ کې د دې ډلې د سفیر بلال کریمي باورلیک منلی دی.
بلال کریمي مخکې له دې، چې په ۱۴۰۰ لمریز کال کې کابل ته طالبان ننوتل د دې ډلې د فرهنګي کمېسیون غړی و او وروسته د دغې ډلې د ویاند مرستیال وټاکل شو.
د خبرپاڼې د معلوماتو له مخې؛ بلال کریمي تېره میاشت په چین کې د افغانستان په سفارت کې دنده پیل کړه.
په افغانستان کې د طالبانو د واکمنۍ له دوو کلونو څخه زیات وخت تېر شوی؛ خو تر اوسه هېڅ هېواد د دغې ډلې حکومت په رسمیت نه دی پېژندلی.
چین لومړنی هېواد دی، چې د طالبانو تر واک لاندې افغانستان ته یې نوی سفیر لېږلی دی.
د سنبلې په میاشت کې د طالبانو د لومړي وزیر مرستیال ملا حسن اخوند د چین د نوي سفیر باورلیک د ځانګړو مراسمو په ترڅ کې ومانه.
په داسې حال کې چې هېڅ هېواد طالبان په رسمیت نه پېژني؛ خو یو شمېر هېوادونو لکه؛ ایران، ترکیه، پاکستان، روسیې او چین د طالبانو غړي د ډېپلوماټانو او د افغانستان د سیاسي او قونسلي خدماتو د مشرانو په توګه منلي دي.
په کابل کې د دغو هېوادونو سفیران او استازي هم حضور لري.
په کوئټه کې د خبریالانو د معلوماتو له مخې چې تېره شپه بریدګرو له څو لوریو پر مچ زندان او بېلابېلو سیمو توغندي ویشتلي چې په پایله کې یې ځینې کورونه او ودانۍ زیانمنې شوې، د بریدګرو او پاکستاني امنیتي ځواکونو ترمنځ سختې نښتې شوې او د ښار له ټولو برخو پولیس دغې سیمې ته غوښتل شوي دي.
په خواله رسنیو کې نن سې شنبه د (سلواغې ۱۰مه) ځینې داسې ويډيوګانې خپرې شوې چې ادعا کیږي د دغه برید اړوند دي او په پوځي چاوڼیو د سپکو او درنو وسلو بریدونه په کې له ورایه ښکاري، د دې تر څنګ د نیول شويو ملیشه عسکرو ويډیوګانې هم په ایکس خواله رسنۍ کې ښکته پورته کیږي، چې ګواکې په دغه جګړه کې یرغمل نیول شوي دي.
د بلوچستان په مرکز کوئټه کې خبریالان وايي چې له تېرې شپې راهیسې په دغه ښار کې بیړنی حالت رامنځته شوی، د دوی په خبره چې حکومت د شپې په ټولو ځايي روغتونونو کې د بیړني حالت اعلان کړی او دوی یې چمتو کړي دي.
ځايي سرچینې وايي، د تېرې شپې له بریدونو را وروسته په سیمه کې د بریښنا او انټرنیټ لیکې پرې شوې دي او له کوره په وتو او تګ راتګ بندیز لګېدلی دی.
د تیرې شپې له بریدونو وروسته بلوڅ بیلتون پالو ته په منسوب غږیزو پیغامونو کې د سیمې خلکو ته ويل شوي چې له کورونو و نه وځي او د کوئټې لوري ته له تګ راتګ ډډه وکړي.
لا هم د دغو بریدونو د سر او مال د زیانونو په اړه خپلواکو سرچینو څه نه دي ويلي، یوازې بلوڅ بیلتون پاله ډله او د پاکستان حکومت یو او بل ته د زیانونو د ور اوښتو ادعاوې کوي.
تر اوسه پورې دا نه ده معلومه چې جګړه درېدلې که لا هم روانه ده خو د بلوچستان چارواکو ویلي چې د جګړې په سیمه کې په وسله والو پسې د پلټنې عملیات روان دي.
د پاکستاني رسنیو د راپورونو له مخې؛ تېره شپه ناوخته وسله والو د بلوچستان په کاچي سیمه کې د مچ پر زندان او ور څېرمه حکومتي ودانیو د درنو او سپکو وسلو ډله ییز بریدونه کړي دي.
ويل کیږي په دغه جګړه کې توغندي هم کارول شوي او جګړه تر سهاره پورې غځېدلې ده چې د سر او مال زیانونه په کې اوښتي دي.
د دغو بریدونه پړه د بلوڅ بیلتون پالې وسله والې ډلې منلې، او دعوه یې کړې چې نږدې پنځوس پاکستاني پوځيان، پولیس او د ملیشې عسکر یې وژلي، او ځينې هغه یې له ځان سره ژوندي بیولي دي.
د پاکستان بلوچستان ایالت لپاره د اطلاعاتو سرپرست وزیر جان محمد اڅکزي له پاکستاني رسنیو سره په خبرو کې ويلي چې د تېرې شپې بريدونه پاکستاني ځواکونو پر وخت مهار کړي او د ده په خبره چې د سر او مال زیان یې نه دی اړولی.
هغه زیاته کړې چې پر مچ زندان له دریو لوریو بریدونه شوي او دوی یې پر وخت مخه نیولې، هغه وايي پاکستاني پوځ تر د دغو بریدونو وړاندې معلومات تر لاسه کړي و، نو ځکه یې زیان نه دی ور اړولی.
د بلوچستان بولان ولسوالۍ او مچ زندان د دغه ایالت مرکز کوئټې ښار سوېل ختیځ ته په ۶۴ کیلو مترۍ کې پرته سیمه ده چې له تېرو دوو لسیزو یې امنيتي حالت خراب دی، په ځايي ملیشو او حکومتي ودانیو ډیر کله بریدونه کیږي، دغه تاریخي زندان په ۱۹۲۸ میلادي کال کې د انګرېزانو له لوري جوړ شوی چې سلګونه بندیان په کې دا مهال ساتل کیږي.
سیمه ییزو سرچینو د دوشنبې په ورځ د ترکیې انادولو خبري اژانس ته ویلي، چې د سوریې په ختیځ کې د امریکا پر یوې اډې توغندی لګېدلی؛ خو نور جزییات یې نه دي ورکړي.
دغې سرچینې د نوم د نه ښودلو په شرط ویلي، چې د سوریې حساکه ولایت کې د امریکا شدادي پوځي اډې ته نږدې یو راکټ لګېدلی دی.
سرچینې په دې اړه نور معلومات نه دي ورکړي. امریکا هم تر اوسه په سوریه او عراق کې پر خپلو اډو د وروستیو بریدونو په اړه څه نه دي ویلي.
تر دې مخکې د یکشنبې په ورځ د امریکا مرکزي قوماندانۍ ویلي وو، چې د اردن او سوریې پولې ته څېرمه د التنف په سیمه کې د امریکا پر پوځي اډې په برید کې درې پوځیان وژل شوي او ۲۸ نور ټپیان شوي دي.
په عراق کې د اسلامي مقاومت نومې ډلې د برید مسوولیت منلی و.
التنف د سوریې په خاوره کې د رژیم له کنټرول څخه بهر موقعیت لري؛ چیرې چې د سوریې، عراق او اردن سرحدونه سره یوځای کیږي، دغلته په یوه پوځي اډه کې یو شمېر امریکایي سرتېري مېشت دي.
په اوکراین کې د روانې جګړې او توغندیزو بریدونو له امله ځپل شوي یوه ډله زمریان، له ۸۸ ساعته سفر وروسته په فرانسه کې یو ژوبڼ ته ورسېدل چې وروسته له دې به د دوی دایمي کور وي.
د نیوزویک مجلې د راپور له مخې؛ د حیواناتو د هوساینې نړۍوال وجهي صندوق"IFAW" ویلي، چې درې زمریان په ختیځې اروپا کې پروت اوکراین څخه د پولڼډ او اوکراین د پولې له لارې د فرانسې بورګنډي سیمې کې د پارک دې لوکس په نوم یو ژوبڼ ته رسېدلي دي.
دغه زمریان چې اطلس، لولادجا او قوین نومیږي، فرانسې ته تر انتقال وړاندې، له ژوبڼ څخه کییف ته نږدې د وحشي حیواناتو د ژغورنې یو مرکز ته انتقال شوي وو.
د حیواناتو د هوساینې د نړۍوال وجهي صندوق ویاند انلین کلوز ویلي: "حیوانات هم لکه د انسانانو په څېر، د راکټونو او توغندیو د لګېدو له خطر سره مخامخ دي. د جګړو پر مهال چاودنې او ډزې پر حیواناتو جدي اغیز لرلی شي."
په ځانګړې توګه اطلس د ژغورلو پر مهال په ډېر ناوړه وضعیت کې و، د هغه د اوسېدو ځای ته نږدې د شویو بمباریو د غږونو له امله دغه نر زمری چې په یوه وړه کانکړيټي خونه کې د شخصي مالک له خوا ساتل کېده، سخت په قهر شوی و. دغه زمری په داسې حال کې موندل شوی و، چې په دغه کانکريټي خونه کې کلک تړلی و او په بدن یې بېلابېل ټپونه وو. د هغه وزن هم خورا ډېر و.
دا شونې نه ده، چې دغه زمریان دې بېرته ځنګل کې خوشې شي، ځکه چې دوی رواني صدمې ليدلې دي او خورا ډېر وخت یې بند کې تېر کړی.
ژغورونکي په دې باور دي، چې د دوی نوی کور به دوی ته هغه پاملرنه وکړي چې دوی ورته اړتیا لري.
د امریکا د ملي امنیت د شورا ویاند د ایران په ملاتړ ملېشې د امریکايي ځواکونو پر ضد د برید مسوولې بللې او ویلي یې دي، چې د جوبایډن اداره به په ډېر مناسب ډول ځواب ورکړي. جان کربي زیاته کړه؛ موږ له ایران سره د پراخې جګړې او په سیمه کې د جګړې د پراخېدو په لټه کې نه یو.
تر دې وړاندې یوه امریکايي چارواکي پولیټیکو مجلې ته ویلي وو، چې امریکا په اردن کې پر خپلو پوځیانو د برید په اړه د "د ځواب ورکولو پر لارو چارو" غور کوي.
په همدې حال کې یو شمېر امریکايي سیاستوالو د دغه هېواد له ولسمشر جوبایډن څخه غوښتي چې د ایران پر ضد اقدام وکړي.
د امریکا ولسمشر جوبایډن د یکشنبې په ورځ وویل، چې د سلواغې په اوومه د اردن په شمال ختیځ کې پر امریکايي ځواکونو د ایراني ملاتړو ډلو د بې پېلوټه الوتکو په بریدونو کې درې امریکايي پوځیان وژل شوي او تر ۲۵ زیات ټپیان شوي دي.
د امریکا د ولسي جرګې غړی جیک لاترنر پر امریکایي پوځیانو د ایران په ملاتړ د نیابتي ډلو د حملې په غبرګون کې وویل له هغو ترهګرو چې د ایران له ملاتړه برخمن دی او هغه کسان چې په امریکایي پوځیانو د دغه حملې عامل دی باید ورسره حساب وشي.
د اردن او سوریې په سرحدي سیمه کې د درېیو امریکايي پوځیانو له وژل کېدو وروسته رسنیو د دمشق په جنوب کې د «سیده زینب» په سیمه کې د انقلابي ګارډ پر مرکز د برید خبر ورکړ.
د سوریې دولتي رسنیو اعلان کړی، چې په دغه برید کې یو شمېر "ایراني سلاکاران" وژل شوي دي؛ خو په سوریه کې د ایران سفیر دغه خبر رد کړی دی.
د سوریې رسمي خبري اژانس د دوشنبې په ورځ د بهمن د پوځي سرچینو له قوله راپور ورکړ چې «اسراییل د دمشق په جنوب کې یو شمېر سیمې په ۱۳:۰۰ بجو په نښه کړې.
دغه خبري اژانس زیاته کړه؛ په دمشق کې د هوایي حملې په نتیجه کې یو زیات شمېر ملکیان مړه او ژوبل شول او مالي تاوانونه هم اړولي دي.
په ورته وخت کې د سپاه پاسداران اړوند تسنیم خبري اژانس لیکلي، چې د ایران یو مشورتي مرکز په نښه شوی دی.
دغه خبري اژانس د برید پړه پر اسراییل واچوله.
په دمشق کې د ایران د اسلامي جمهوریت سفیر حسین اکبري په اېکس ټولنیزه شبکه کې د برید پړه پر اسراییل واچوله؛ خو ادعا یې وکړه چې د ایران کوم مشورتي مرکز په نښه شوی نه دی.
هغه زیاته کړه، چې هېڅ یو ایراني تبعه یا سلاکار نه دی وژل شوی.