د ایران ولسمشر وايي هیواد به یې جګړه پیل نه کړي خو زورور ته به ځواب ور کړي

AP ۱۴۰۲ سلواغه ۱۳

یوه ورځ وروسته له هغه چې امریکا په عراق او سوریه کې د ایران پر مرکزونو د بریدونو د پلانولو اعلان وکړ، د ایران ولسمشر ابراهیم رییسي د جمعې په ورځ ویلي، چې هیواد به یې جګړه پیل نه کړي، خو هر هغه چا ته به «سخت ځواب ورکړي» چې له دوی سره له زوره کار اخلي.

په روانه اونۍ کې په دې اړه پوښتنې زیاتې شوې چې واشنګټن به په اردن کې د یوې ایراني پلوه ډلې له خوا د دوی پر اډه برید کې د درې امریکایي سرتیري د ووژل کیدو غچ په څه ډول له ایران څخه واخلي.

سي بي ایس نیوز ټلویزیون، د امریکايي چارواکو له قوله د پنجشنبې په ورځ راپور ورکړی و چې امریکا په عراق او سوریه کې د ایراني پرسونل او تاسیساتو په ګډون پر څو موخو د څو ورځنیو بریدونو پلان نهايي کړی دی.‌

د ایران ولسمشر رییسي په یوه ټلویزیوني وینا کې ویلي: «موږ به هېڅ جګړه پیل نه کړو، خو که څوک وغواړي چې زموږ سره له زوره کار واخلي، سخت ځواب به ورکړو.»

رسیسي زیاته کړې: «پخوا چې کله دوی (امریکایانو) غوښتل له موږ سره خبرې وکړي، ویل به یې چې پوځي انتخاب هم یوه شونتیا ده، اوس وايي چې له ایران سره د جګړې نیت نه لري.»

څلورو امریکايي چارواکو رویټرز خبري اژانس ته ویلي، چې د امریکا ارزونو ښودلې چې هغه بې پیلوټې الوتکې چې د درې امریکايي پوځیان یې وژلي او تر ۴۰ ډېر نور یې ټپیان کړي، د ایران له خوا جوړه شوې ده.

پر اسراییل د حماس د تېر اکتوبر د ۷ له برید او د تل ابیب په ځوابي یرغل پسې منځني ختیځ کې ایران ملاتړو ډلو هم د اسراییل او امریکا پر اهدافو وخت ناوخت بریدونه کړي دي.

په مقابل کې امریکا او اسراییل هم په عراق او سوریه کې د ایران ملاتړو وسلوالو پر مرکزونو بریدونه کړي او یوه برید کې د ایران د سپاه پاسداران څلور قوماندانان هم ووژل شول.

ایران نن هم منلې چې په سوریه کې یې یو پوځي سلاکار د اسراییل برید کې وژل شوی دی.

دا پېښه یوه ورځ له هغه وروسته ده چې باوري سرچینو روټیرز ته پرون ویلي و، ایران د سپاه پاسدارن ځینې مهم قوماندانان له سوریې اېستلي دي.

د راپورونو له مخې، په تېرو ۴۰ ورځو کې د ایران د سپاه پاسدران شپږ سلاکاران په سوریه کې وژل شوي دي.


نور خبرونه

رادیو

ستاسو د غږ لپاره کور

خپل فلمونه او غږونه را ولېږئ