د طالبانو د عامې روغتیا وزارت د وقایوي طب عمومي رییس وايي: « پلان لرو چې په نږدې راتلونکي کې د هېواد په ټولو زونونو کې د سرطان ناروغۍ د درملنې ۵۰ بستریز روغتونونه جوړ کړو.» ډاکټر احمد سیر پاڅون دا خبره د سرطان ناروغۍ د نړۍوالې ورځې په مناسبت نن په کابل کې کړې ده.
د نوموړي په خبره؛ په افغانستان کې د سرطان ناروغۍ تشخیص او درملنې روغتونونو په جوړېدو سره به بهرنیو هېوادونو ته د درملنې لپاره د ناروغانو د تلو مخنیوی وشي.
د دغو روغتونونو د جوړېدو خبر په داسې حال کې مطرح کیږي، چې څه موده وړاندې طالبانو ویلي؛ د کابل علي اباد روغتون د سرطان لپاره ځانګړی کوي.
تر هغه مخکې د افغانستان د کرېکټ ملي لوبغاړي محمد نبي او عطا خیریه بنسټ هم په افغانستان کې د سرطان ناروغۍ د درملنې روغتون جوړولو ژمنې کړې وې؛ خو لا هم په افغانستان کې د سرطان ناروغان تر ډېره پاکستان ته د درملنې لپاره ځي؛ خو د درملنې کوم معیاري روغتون نه شته.
دا په داسې حال کې ده، چې طالبانو په افغانستان کې په سرطان د اخته ناروغانو د شمېرو په اړه څه نه دي ویلي.
