د طالبانو د سټنډرډ ادارې د دوشنبې په ورځ د (سلواغي ۱۶مه) په خپله اېکس پاڼه لیکلي چې د نیمروز بندر له لارې یې د ۱۹ ټانکرو بې کیفیته تېلو مخه نیولې. د سټندرډ ادارې ویلي چې دغه تېل د یادې ادارې له سټنډرډونو سره برابر نه وو، او هېواد ته یې د راوړلو اجازه نه ده ورکړې.
د سټنډرډ ادارې (انسا) له ټولو سوداګرو څخه غوښتنه کړې چې هېواد ته له ملي سټنډرډونو سره په ټکر کې توکي وارد نه کړي.
د یادې ادارې له لوري دوه ورځې وړاندې هم له تېلو بار ۱۳ ټانکره د نیمروز بندر له لارې ایران ته ورګرځول شوي وو.
تر دې وړاندې ایراني چارواکو د افغانستان په سرحدي ادارو کې د تېلو د کیفیت معلومولو معیارونه د پوښتنې وړ بللي وو.
ایراني چارواکو ویلي وو، چې طالبان دغه تېل د کیفیت معلومولو په ماشینونو نه؛ بلکې په خپل زړه او خپله خوښه ورته میعارونه ټاکي.
