د طالبانو د چاپېریال ساتنې او لوړو زدهکړو وزارت وایي، چې د اقلیمي بدلونونو له امله د پېښو شویو ستونزو سره د مبارزې په پار یې راتلونکې اونۍ درې ورځنۍ غونډه وربللې ده.
د طالبانو تر واک لاندې دغو دوو ادارو تېره ورځ په یوې خبري ناسته کې وویل، دغه غونډه چې ننګرهار په پوهنتون کې جوړېدونکې ده په حضوري او انلاین بڼه به پر مخ ولاړه شي.
په پام کې ده، چې په دغې غونډه کې به شاوخوا د کورنیو او بهرنیو چاپېریال ساتونکو لهخوا ۱۴۰ مقالې ولوستل شي او په افغانستان کې د اقلیمي بدلون پر اغېزو او له هغو څخه به د وتلو پر لارو چارو راټولې وي.
تر دې وړاندې هم په کور د ننه او هم بهر کې د وچکالۍ له امله د افغانستان اقلیمي وضعیت د اندېښنې وړ ښودل شوی و او داسې راپورونه هم خپاره شوي و، چې په دغه هېواد کې شاوخوا ۲۱ مېلیونه خلک د څښاک پاکو اوبو ته لاسرسی نه لري.
د طالبانو تر واک لاندې د چاپېریال ساتنې ادارې په وینا، افغانستان د اقلیمي بدلون له امله د رامنځته شویو ستونزو سره د مبارزې لپاره ۲۰ میلیارده ډالرو ته اړتیا لري.
وروستۍ څېړنې ښيي، چې افغانستان د اقلیمي بدلونونو له امله په نړۍ کې شپږم ډېر ځپل شوی هېواد دی او د افغانستان ډېرې سیمې د وچکالۍ، سېلابونو، ځمک ښویېدنې سره مخامخې دي او هر کال بې شمېره مالي او ځاني تاوانونه خلکو ته اړوي.