د طالبانو کډوالو چارو وزارت: له پاکستانه څه باندې ۱۵۰ تنه افغان کډوال راستانه کړل شوي

AP ۱۴۰۲ سلواغه ۱۷

د طالبانو کډوالو چارو وزارت ویلي دغه افغان کډوال د ننګرهار د تورخم او کندهار د سپین بولدک له لارو افغانستان ته راستانه شوي دي.
دغه وزارت وايي، په دغو کډوالو کې چې په جبري ډول راستانه کړل شوي، څلور له زندانه خوشي شوي ماشومان هم شامل دي.

دغه وزارت د سې شنبې په ورځ د (سلواغي ۱۷مه) په اېکس پاڼه لیکلي چې، تېره ورځ ۱۵۹ افغان کډوال په جبري ډول د سپین بولدک او تورخم له لارو هېواد ته راستانه شوي.
یاد وزارت د ننګرهار ولایت د تورخم سرحدي امریت له قوله لیکي، ۱۹ کورنۍ چې شمېر یې ۹۸ تنه کیږي په جبري ډول له پاکستان څخه راستنې شوې او د کډوالو په اداره کې تر ثبتېدو وروسته د مرستو په موخه د ملګرو ملتونو عالي کمشنرۍ دفتر، خوړو نړیوال پروګرام او د کډوالو نړیوال سازمان ته ور وپېژندل شوې.
د طالبانو کډوالو چارو وزارت زیاتوي، د دې تر څنګ د کندهار ولايت د سپين بولدک سرحدي امریت د معلوماتو پر بنسټ اووه کورنۍ چې شمېر یې ۵۷ تنه کیږي او څلور ماشومان د پاکستان له زندانونو څخه خوشې شوي او په جبري توګه له یادې فرضي کرښې څخه راستانه کړل شوي.
ویل کیږي دغه څلور تنه بې سرپرسته ماشومان د کډوالو نړیوال سازمان ته ورسپارل شوي دي.
دغه وزارت وايي، راستانه کړل شوي کډوال یې د کډوالو په اداره کې تر ثبتېدو وروسته د مرستو په موخه د ملګرو ملتونو عالي کمېشنرۍ، د خوړو نړيوال سازمان او د کډوالو نړیوال سازمان دفترونو ته ورپېژندلي دي.
د یادولو ده چې د پاکستان حکومت له لوري د ۲۰۲۳ کال د اکټوبر په لومړیو کې کډوالو ته د وتلو له خبرداري وروسته تر اوسه پورې څلور لکه او ۸۱ زره ۲۵۶ افغانان د اوسېدو اسنادو نه لرلو په پلمه له دغه هېواده ایستل شوي دي.

نور خبرونه

رادیو

ستاسو د غږ لپاره کور

خپل فلمونه او غږونه را ولېږئ