طالبان وايي قطر په "افغان ټرانس" پټلۍ پروژه کې پانګونې ته چمتو دی

AP ۱۴۰۲ سلواغه ۱۸

د طالبانو پټلۍ ادارې وايي، په تاشکند کې د ازبکستان، پاکستان او قطر د استازو په حضور کې د "افغان ټرانس" اورګاډي د پروژې په اړه څلور اړخیزه غونډه وشوه.
دغه اداره زیاتوي، په دې غونډه کې د قطر استازو په "افغان ټرانس" اورګاډي پروژه کې د پانګونې لپاره چمتوالی وښود.

د طالبانو د پټلۍ ادارې د خبرپاڼې له مخې، د قطر د اورګاډي استازو د دې پراختیايي پروژې لپاره د هغو هېوادونو پانګونه مهمه وبلله چې "افغان ټرانس" اورګاډی ترې تېرېږي.
د دغې خبرپاڼې له مخې، د "افغان ټرانس" اورګاډي په اړه د طالبانو، ازبکستان او پاکستان ترمنځ هوکړه لیک کې ټینګار شوی چې دا پروژه به د سیمې له سوداګرۍ او اقتصادي ودې سره مرسته وکړي.
خبرپاڼه زیاتوي، چې د ازبکستان په پلازمېنه تاشکند کې پرون د څلور اړخیزې ناستې ګډونوالو هوکړه وکړه، چې د "افغان ټرانس" اورګاډي پروژې د اسانتیا لپاره به په راتلونکې غونډه کې بشپړ پلان وړاندې کړي.
د خبرپاڼې پربنسټ، د "افغان ټرانس" په پروژه کې د زياتو پانګوالو د جلبولو په موخه به راتلونکې غونډه له سلا مشورې وروسته د فبرورۍ په ١٩مه جوړه شي.
د افغانستان، پاکستان او ازبکستان ترمنځ د "افغان ټرانس" پټلۍ د جوړولو پلان په ۲۰۱۸ کال کې وړاندې شو، چې یوه لویه اقتصادي لاره جوړه شي چې منځنۍ اسیا د پاکستان د اوبو له بندرونو سره سره وصل کړي.
د دغې پټلۍ د جوړولو لګښت څه باندې څلور نیم ملیارد ډالره اټکل شوی او ۵۷۳ کیلومتره اوږدوالی لري.
د دغه پلان پر بنسټ، دا پټلۍ د ازبکستان له ترمز څخه پیل او د مزارشریف او کابل له ښارونو تر تېرېدو وروسته د پاکستان پېښور ته رسېږي.

نور خبرونه

رادیو

ستاسو د غږ لپاره کور

خپل فلمونه او غږونه را ولېږئ