د هند د شمالي اوتراکنډ ایالت په هالدواني ښار کې د یوه جومات د نړولو په غبرګونو کې د اعتراضونو له امله لږ تر لږه څلور تنه وژل شوي دي.
هندي چارواکو ویلي، د دغه جومات جوړول نا قانونه وو.
پولیسو زیاته کړې، د یوه جومات او دیني مدرسې په ګډون یې یو شمېر نا قانونه ودانۍ هم ویجاړې کړې دي.
د چارواکو په وینا، وروستی اقدام د سترې محکمې د حکم پراساس شوی، چې سیمه کې د نا قانونه استوګن ځایونو ړنګول پکې راغلي دي.
په ورته وخت کې، ځايي خلک دا خبره ردوي او وايي، مخکې له دې چې محکمه د قضيې په اړه وروستۍ پرېکړه وکړي، جومات ويجاړ شوى دى. سیمه کې مېشت مسلمانان وايي، د نريندرا مودي په حکومت کې له دوی سره ناسم چلند کیږي.
د پنجشنبې په ماښام د پولیسو او لاریونوالو ترمنځ په نښته کې سلګونه پولیس افسران او مظاهره کوونکي ټپیان شوي وو.
د دغو لاریونونو اړوند خپاره شوي انځورونه ښيي، چې مظاهره کوونکو موټرونه سوځولي او همدا راز یې پر پولیسو د ډبرو ګوزارونه کړي، چې پولیس یې په ځواب کې اوښکې بهوونکی ګاز کارولی.
له دې تاوتریخوالي وروسته پولیسو په دغه ځای کې ګرځبندیز هم اعلان کړی دی.