د پاکستان پخواني لومړي وزیر او د تحریک انصاف ګوند مشر عمران خان علي امین ګنډاپور د خیبر پښتونخوا د مشر وزیر (اعلی وزیر) په توګه نوماند اعلان کړ. د پاکستان تحریک انصاف ګوند د خیبر پښتونخوا په صوبایي ټاکنو کې ۸۴ څوکۍ ګټلي او کولی شي، چې ایالتي حکومت جوړ کړي.
جیو نیوز د سې شنبه په ورځ (د سلواغې ۲۴مه) راپور ورکړ چې عمران خان د راولپېنډۍ له بندخونې څخه خبریالانو ته وویل: "د خیبر پښتونخوا اعلی وزیر به علي امین ګنډاپور وي."
په ورته وخت کې د تحریک انصاف ګوند هڅه کوي، چې د نورو ګوندونو په اتحاد سره په مرکزي حکومت کې واک تر لاسه کړي.
د جيو نيوز د خبر له مخې؛ ښاغلي خان د نواز شريف له مسلم ليګ (ن)، پاکستان پيپلز ګوند او د متحده قومي حرکت ګوند سره د اتلافي حکومت جوړولو امکان رد کړ او د خپل ګوند چارواکو ته يې امر وکړ، چې د ائېتلافي حکومت جوړولو لپاره له نورو ګوندونو سره خبرې وکړي.
جیوز نیوز لیکلي، چې د تحریک انصاف ګوند خپلواک او متحد نوماندان د ۹۰ څوکیو په ګټلو سره تر ټولو لویه پارلماني ډله ده او اوس په ملي اسمبلۍ کې تر بل هر ګوند زیاتې څوکۍ لري.
د پاکستان په وروستیو ټولټاکنو کې د نورو لویو ګوندونو په منځ کې مسلم لیګ (ن) ګوند ۷۵ څوکۍ او پیپلز ګوند ۵۴ څوکۍ ګټلې دي.
دا دواړه ګوندونه هڅه کوي، چې د حکومت جوړولو لپاره اېتلاف جوړ کړي.
عمران خان ویلي، چې د فېبرورۍ د اتمې ټاکنې به په پاکستان کې اقتصادي ثبات راولي؛ خو هغه کسان چې حکومت کول غواړي په "پیسو وینځلو" کې ښکېل دي.
ښاغلي خان دا هم زیاته کړه؛ کله چې نواز شریف خپله خبري غونډه وځنډوله نو پوه شو، چې ګوند یې ټاکنې نه دي ګټلي.
هغه وویل: "نواز شریف او مریم نواز دواړو ټاکنې بایللي دي."
د پاکستان پخواني لومړي وزیر ویلي، چې ګوند به یې له نورو ګوندونو سره د راتلونکي لومړي وزیر پر نوم له هوکړې مخکې په ټاکنو کې درغلۍ ننګوي.
هغه زیاته کړه: "موږ به د ټاکنو د پایلو [د درغلیو] پر ضد د پاکستان سترې محکمې ته لاړ شو."
