د طالبانو اقتصادي کمیسیون وایي، د هیواد په ۱۲ ګمرکونو کې یې د ۲۴ لویو برېښنايي سکینرونو د لګولو طرحه تصویب کړې ده. دغه کمېسیون نن ویلي، د دغو سکینرونو د لګولو چارې به د اته میلیارد افغانیو په لګښت په دوو کلونو کې بشپړې شي.
د طالبانو د اقتصادي کمیسیون د مرستیال مطبوعاتي دفتر د یوې خبرپاڼې په خپرولو سره زیاته کړې، چې ددغو د سکینرونو د نصبولو د قرارداد موده ۱۳ کاله ده او دغه پلان د «عامه او خصوصي شرکتونو» په پانګونې سره پلې کیږي.
په خبرپاڼه کې راغلي، چې دغه پلان به د فساد مخه ونیسي او د ګمرکونو د عوایدو په راټولولو کې به روڼتیا، چټکتیا او ځیرتیا رامنځته کړي.
د طالبانو په خبره، د دې پلان په عملي کیدو سره به ګمرکي عواید زیات شي او د توکو د قاچاق مخه به هم ونیول شي.
طالبانو دغه راز زیاته کړې، چې د دغو سکینرونو د لګولو د پلان په عملي کېدو سره به دوه زره کسانو ته د کار زمینه هم برابره شي.
که څه هم د افغانستان مخکني حکومت څو ځلې هڅه وکړه، چې په بندرونو کې سکینرونو ولګوي، خو دا هڅې د نه پاملرنې له امله عملي نه شوې.
پر افغانستان د طالبانو له واکمنیدو وروسته دغه ډله ادعا کوي، چې له فساد سره یې مبارزه کړې ده او د ګمرکونو عواید یې زیات کړي دي.
