که څه هم د دغې ناستې په اړه لاتراوسه رسمي مالومات نه دي ورکړل شوي؛ خو ویل کېږي چې افغانستان ته د مرستې رسوونه، د سولې په چاره کې د ځانګړي استازي ټاکنه او د طالبانو سره د تعامل اړوند موضوعات به د دغې ناستې د سر، سر ټکي وي.
طالبانو تر دې وړاندې د ملګرو ملتونو لهخوا د افغانستان لپاره د ځانګړي استازي ګومارل رد کړي وو.
په دغه ناسته کې د پاکستان په استازیتوب د افغانستان لپاره د دغه هېواد ځانکړی استازی اصف درانی ګډون کوي.
له بلې خوا ښځینه معترضو د یوې خبرپاڼې په خپرولو سره تېره ورځ ویلي و، چې په تېرو دوو کلونو کې د نړۍوالو له پراخو هڅو او د مېلیونونه ډالرو مرستو سره دا روښانه شوه چې دغه ډله بدلېدونکې او انعطاف منونکې نده او ان د دغه هېواد د اوسېدونکو لومړنیو حقونو ته درناوی نه لري.
دوی وایي، د افغانستان لپاره د ځانګړي استازي ګومارل کومه پایله نه شي لرلای او د ستونزو او ناورین په حل کې کوم رول هم نه شي لوبولای.
دوی له ملګرو ملتونو غواړي، چې طالبانو ته دې باج نه ورکوي او د افغانستان د خلکو او په ځانګړې توګه د ښځو په اړه دې پرېکړه نه کوي او د خلکو د ریښتینو استازو له شتون پرته دې کومه ناسته هم نه ترسره کوي.
