د ایران د ځمکنيو ځواکونو قوماندان کیومرث حیدري پر پوله د بندیزونو د لګولو پر وړاندې د طالبانو د نیوکو په غبرګون کې وویل: غواړو پر پوله بندیزونه سخت کړو او هیڅوک نه شي کولای اعتراض وکړي.
طالبانو تر دې وړاندې ویلي و، چې افغانستان د هیڅ هېواد لپاره ګواښ نه دی او د دغې تګلارې لپاره اړتیا نه شته.
تر دې وړاندې د طالبانو ویاند د ایران د دغې تګلارې په اړه سیمهایزو رسنیو ته ویلي و، چې دغه ګام باید د دواړو غاړو په ګډ تفاهم سره ترسره شي.
ذبیحالله مجاهد ویلي و، چې د ایران په ګډون هیڅ یو هېواد ته د افغانستان لهخوا ګواښ نه پېښېږي او په اوسنیو شرایطو کې «د دغه کار لپاره اړتیا نه شته.»
د ایراني رسنیو د راپورونو له مخې، د ایران د ځمکنیو پوځي ځواکونو قوماندان د طالبانو د ویاند د څرګندونو په غبرګون کې ویلي: «هغه څوک چې زموږ په ګاونډۍ جغرافیه کې اوسېږي، موږه تل د ښه ګاونډیتوب درناوی ورته کوو او هیڅګله هم د بل پر خاوره د تېري، ولکې او یا ګواښ هوډ نه لرو او نه به په راتلونکي کې دغسې هوډ ولرو .»
کیومرث حیدري زیاته کړه: «دا په ټولو هېوادونو کې عامه ده، چې په خپله خوښه او په خپلو تګلارو سرحدي خنډونه جوړ کړي او هیڅوک نه شي کولای اعتراض وکړي، چې ولې مو زموږ پولې ته نږدې دغه کار کړی.»
نوموړي ټینګار کړی، چې ایراني غاړه په خپله پوهېږي چې څنګه په خپلو پولو کې امنیت خوندي کړي «نو ځکه نور نه شي کولای موږ ته ووايي، چې تاسې په پولو کې څه کوئ.»
د ایران د ځمکنیو ځواکونو قوماندان تر دې وړاندې ویلي و، د افغانستان سره په پوله یې د امنیتي خنډونو لومړنی پړاو د ۷۴ کیلو مټرو په اوږدوالي د بشپړېدو په حال کې دی.
ښاغلي حیدري دغه پروژه د ایران «تر ټولو مهمه او ملي» پروژه بللې وه.
د ایراني پوځ دغه چارواکي ویلي و، چې د پولې د تړلو لپاره د څلورو ودانیزو عملیاتو لومړی پړاو ترسره کېدونکی دی، دمګړۍ دیوالونه یې جوړ شوي او تر هغې وروسته به یې د سړک جوړونې چارې هم پیل شي.
په افغانستان کې د طالبانو د بیا واکمنېدو وروسته، د دغې ډلې ځواکونه څو، څو ځلې د ایراني پوله ساتو سره د هېواد په لویدیځو څنډو کې په جګړه کیوتي دي.
