د خبریالانو مرکز: پر رسنیو د محدودیتونو د لرې کېدو لپاره دې پر طالبانو فشار راوړل شي
د افغانستان د خبریالانو مرکز د دوحې ناستې له ګډونوالو غوښتي، چې پر رسنیو او خبریالانو د طالبانو د فشارونو د لرې کېدو په موخه دې په دغې ډلې فشارونه راوړل شي.
د افغانستان د خبریالانو مرکز د دوحې ناستې له ګډونوالو غوښتي، چې پر رسنیو او خبریالانو د طالبانو د فشارونو د لرې کېدو په موخه دې په دغې ډلې فشارونه راوړل شي.
یاد مرکز د یکشنبې په ورځ (د سلواغې ۲۹مه) د یوې خبرپاڼې په خپرولو سره د دوحې د ناستې په اړه ویلي، چې په دې ناسته کې باید د خبریالانو او رسنیو اندېښنو ته لومړیتوب ورکړل شي.
د افغانستان د خبریالانو مرکز زیاته کړې، چې پر طالبانو باید فشار راوړل شي؛ تر څو دغه ډله د خبریالانو له نیولو څخه لاس واخلي او د تاوتریخوالي او د رسنیو د ټولنې د غړو له حقونو څخه د سرغړونې قضیې دې وڅېړي.
د افغانستان د خبريالانو مرکز په افغانستان کې د ازادو رسنيو د پياوړتيا، د بيان د ازادۍ د وضعيت د ښه والي او معلوماتو ته د خلکو د لاسرسي په برخه کې د نړۍوال پيوستون او اجماع غوښتنه هم کړې ده.
دغه مرکز په خپله اعلاميه کې ليکلي، چې د دوحې په غونډه کې د مدني ټولنې د استازي لطف الله نجفي زاده له لارې خپلې غوښتنې ملګرو ملتونو ته رسوي.
دا غونډه نن د ملګرو ملتونو د سرمنشي انتونیو ګوترېش په کوربتوب د قطر په پلازمینې دوحه کې پیل شوې ده.
سره له دې، چې یادې غونډې ته د طالبانو استازي هم بلل شوي وو، خو دغې ډلې تېره ورځ وویل چې ملګرو ملتونو د دوی شرطونه نه دي منلي، ځکه بې ګټې ګډون نه کوي.
د ویلو ده، چې طالبانو په تېرو څه باندې دوو کلونو کې لسګونه خبریالان نیولي او په ځینو مواردو کې یې شکنجه کړي هم دي.
