د کندهار د طالبانو والي پر انځور او ويډيو د نه اخيستلو وروستي امر سيمه ييز خبريالان له ستونزو سره مخ کړي کړي دي. د طالبانو د کندهار والي ملا شيرین تېره ورځ په یوه مکتوب کې د دولتي ادارو مسولينو ته ويلي، چې د خپلو رسمي او نارسمي ناستو انځورونه او تصویرونه دي نه اخلي.
د کندهار څخه یو شمېر خبريالانو له افغانستان انټرنشنل – پښتو سره په خبرو کې وويل، چې د طالبانو د والي له امر وروسته نن دوشنبه د هېڅ دولتي ادراې مسوول ورسره تصويري مرکې نه کولې.
د طالبانو د مطبوعاتو مسوولین په دې موضوع اړوند خبريالان هم له خبرو کولو منع کړي دي.
يوه سيمه ييز خبريال په دې اړوند وويل: « نن د ټلويزيوني راپور جوړولو لپاره د پوهنې او ګمرک رياستونو ته د راپور جوړلو لپاره اجازه را نه کول شول.»
خبريالان پر تصويري مرکو بنديز د کار په برخه کې د لويو ستونزو او ننګونو په ډول يادوي.
د افغانستان د خبريالانو مرکز هم د طالبانو د والي دغه بنديز يو غيرې قانوني او د اندېښنې وړ چاره بللې ده.
دغه مرکز په خپله خبرپاڼه کې دا کړنه د بیان د ازادۍ د محدويت او ځان سانسورۍ د زياتوالي لامل بولي.
خبرپاڼه زياتوي: « دا یو غیرقانوني عمل دی، چې د بیان پر ازادۍ د لا زیاتو محدودیتونو، د ځان سانسور د زیاتوالي او په دې ولایت کې معلوماتو ته د رسنیو د لاس رسي د پام وړ کمولو لامل ګرځي.»
د افغانستان د خبريالانو مرکز د کندهار له ولايتي ادارې څخه د دې بنديز د ژر لرې کېدو غوښتنه کړې ده.
په کندهار کې پر انځور او ويډيو د طالبانو د والي ملا شيرين د تازه بنديز سره - سره سم ولایت مقام په خبرپاڼو کې د خپلو ناستو انځورونه هم بند کړي او يوازي په ليکلې بڼه خپل خبرونه شريکوي.
طالبانو په خپله لومړنۍ پنځه کلنه واکمنۍ کې پر انځور اخیستلو بندیز لګولی و او دغه کار یې له اسلام سره په ټکر کې بللی و، دغې ډلې په دویم ځل واک ته تر رسېدو وړاندې په دوحه کې د مذاکراتو پر مهال ژمنه کړې وه، چې دوی له پخوا بدل شوي او دا ځل به یې چارې او بندیزونه د پخوا په څېر نه وي.
د ملا شیرین له لوري د تازه خپاره شوي مکتوب له لارې په انځور اخیستلو بندیز د طالبانو د ډلې د پخواني دريځ څرګندويي کوي.
