الجزیري خبري اژانس د راپور له مخې د امریکا د پوځ یوه فعال غړي په واشنګټن ډي سي کې د اسراییل د سفارت مخې ته ځان سوځولی دی. راپور وايي، دغه امریکايي د یکشنبې په ورځ د اسراییل د «ویجاړونکي جګړې» په وړاندې د اعتراض په توګه ځان ته اور ورته کړی.
په راپور کې ویل شوي چې دغه کارکوونکي په داسې مهال ځانته اور ورته کړی چې د «ازاد فلسطین» چیغې یې وهلې.
د چارواكو په وينا، د پېښې ځاى ته څېرمه يو ناپېژانده سړى د سختو ټپونو له امله روغتون ته لېږدول شوى او روغتيايي حالت يې د اندېښنې وړ دى.
خو د امریکا هوايي ځواک ویلي چې په پيښه کې د هوايي ځواک یو فعال کارکوونکی شامل دی.
هم مهاله د واشنګټن پولیسو د یوه داسې موټر په اړه پلټنې پیل کړې چې ګومان کیږي چاودېدونکي توکي به پکې ځای په ځای وي.
په واشنګټن کې د اسراییل د سفارت ویاند تل نعیم ویلي چې په پېښه کې د سفارت هېڅ کارکوونکي ته زیان نه دی رسیدلی.
په واشنګټن کې د اسراییل سفارت په غزه کې د جګړې پر ضد د روانو لاریونونو ځای دی، چې له پیل راهیسې په غزه کې تر ۲۹ زره زیات کسان وژل شوي دي.
د ډېسمبر په میاشت کې یو بل لاریون کوونکي په اتلانتا کې د اسراییل د قونسلګرۍ مخې ته ځان ته اور واچاوه. پولیسو ویلي دي چې ښایي دا یو سیاسي کار وي.
