طالبان: ترکمنستان دې د تورغنډۍ-هرات او اندخوی-شبرغان پر لویه لار پر رېل پټلۍ پانګونه وکړي
طالبانو له ترکمنستان څخه غوښتي چې د تورغنډۍ - هرات او اندخوی - شبرغان پر لور تر مزار شریف پورې د رېل پټلۍ د لیکې د غځولو په برخه کې پانګونه وکړي.
طالبانو له ترکمنستان څخه غوښتي چې د تورغنډۍ - هرات او اندخوی - شبرغان پر لور تر مزار شریف پورې د رېل پټلۍ د لیکې د غځولو په برخه کې پانګونه وکړي.
د طالبانو د بهرنیو چارو وزیر امیر خان متقي د ترکمنستان د وزیرانو شورا مرستیال او د بهرنیو چارو وزیر رشید مُرَدوف سره په کتنه کې د دې مطلب په څرګندولو سره د دواړو هېوادونو ترمنځ د سوداګریزو اړیکو پر پراختیا ټینګار وکړ.
دغه وزارت د دوشنبې په ورځ (د کب ۷مه) نیټه د یوې خبرپاڼې په خپرولو سره ویلي، چې په دې ناسته کې دواړو لورو په عشق اباد کې د افغانستان د ډېپلوماتیک حضور د سطحې د لوړولو، د افغانستان په خاوره کې د ټاپي پروژې د کار د عملي پیل، هرات ولایت ته د ترکمنستان د وارداتي برېښنا د زیاتوالي، د لاجوردو لارې د احیا، د افغانستان د رېل پټلۍ پر پراختیا او د ترکمنستان د پانګونې په تړاو هر اړخیزې خبرې وکړې.
د خبرپاڼې له مخې؛ د ترکمنستان د بهرنیو چارو وزیر ویلي چې د تورغنډۍ د رېل پټلۍ د سټېشن د ظرفیت لوړولو طرحه نهايي شوې ده او ډیر ژر به یې چارې پیل شي.
ښاغلي متقي د افغانستان او ترکمنستان ترمنځ د دوه اړخیزو سوداګریو د مالونو د لېږد په برخه کې د زیاتوالي په موخه افغان سوداګرو او ټرانسپورټي کارکوونکو ته د ویزو په برخه کې د اسناتیاو د رامنځته کېدو غوښتنه هم وکړه.
په خبرپاڼه کې همداراز راغلي، چې متقي په دغه کتنه کې د افغانستان په خاوره کې د ټاپي پروژې د کار د عملي پیل په اړه د افغانستان د چمتو والي ډاډ ورکړی دی.
اخوا رشید مُرَدوف بیا د دواړو هېوادونو تر منځ د تګ او راتګ د اسناتیاو په رامنځته کولو ټینګار وکړ او زیاته یې کړه، چې افغان محصلینو ته د برښنا، رېل پټلۍ، ټرانسپورټ او ګازو په برخه کې بورسيې ورکړي.
د یادولو ده، چې دواړه لوري هوکړې ته ورېدل څو په نېږدې راتلونکي کې په عشق اباد کې د لاجوردو لار د مسیر پنځه ګونو هېوادونو د استازو ناسته ترسره شي.
