د هالنډ لوموړي وزیر مارک روت د جمعې په ورځ د اوکراین په شمال ختیځ ښار خارکیف ښار کې د دغه هیواد له ولسمشر ولادمیر زلنسکي سره د امنیتي تړون له لاسلیک وروسته وویل، چې هیواد به یې د روسیې د ځواکونو په شاتمبولو لپاره له اوکراین سره ۸۰۰ زره د توپونو مرمیو مرسته وکړي.
ښاغلي روتي د روسیې له پولې څخه یوازې ۴۰ کیلومتره لرې خارکیف ښار ته په ناڅاپي سفر له ښاغلي زیلینسکي سره وکتل. هغه په وروستیو دوه میاشتو کې د لویدیځو هیوادونو اووم مشر دی چې له اوکراین سره امنیتي تړون لاسلیکوي.
ښاغلي روتي ویلي، چې دغه د توپونو مرمۍ په اونیو کې اوکریان ته راورسیږي.
اوکراین د توپونو د مرمیو له کمښت سره په داسې حال کې مخامخ دی چې پوځیان یې هڅه کوي د روسي ځواکونو د پرمختګ مخه ونیسي. روسي ځواکونو یو ځل بیا د اوکراین په ختیځ کې خپلو بریدونو ته زور ورکړی دی.
ښاغلي زیلینسکي ویلي، چې هالنډ سره د امنیتي تړون په پایله کې به هغه هیواد له اوکراین سره سږ کال ۲.۲ میلیارده ډالره مرسته وکړي او په راتلونکو لسو کلونو کې به له دوی څخه په دفاعي برخو کې ملاتړ وکړي.
