د افغانستان د معاصرو مطالعاتو د مرکز مشر د خپلو سرچینو په حواله وايي، وروستیو کې داعش هڅه کوله په کابل کې د روسیې سفارت ته چاودنه ور کړي. اندري سرنکو ویلي، چې د کب میاشتې په ۱۳مه نیټه د روسیې سفارت کارکوونکو ددغه سفارت په دروازه کې بم کشف کړ.
دغه سفارت وروسته طالبانو ته خبر ورکړ او دې ډلې دا بم شنډ کړ.
تر اوسه طالبانو او د روسیې سفارت په دې اړه څه نه دي ویلي.
اندري سرنکو په دې اړه د طالبانو چوپتیا او د دې پيښې پټول د پوښتنې وړ بللی دی.
په مسکو کې د افغانستان د معاصرو مطالعاتو د مرکز مشر د سراج الدین حقاني او په کابل کې د روسیې د سفیر ترمنځ وروستۍ لیدنې ته په اشارې سره وویل، چې په کابل کې د روسیې د سفارت په دروازه کې د بمب موندلو مسله ښايي د دوی د خبرو اصلي موضوع وي.
د طالبانو د کورنیو چارو وزیر د سې شنبې په ورځ د یوې خبرپاڼې په خپرولو سره د سراج الدین حقاني او په کابل کې د روسیې د سفیر د کتنې خبر ورکړ.
په خبرپاڼه کې راغلي، چې ښاغلي حقاني په امنیتي همکاریو ټینګار کړی دی.
که څه هم طالبانو په ځلونو ادعا کړې ده چې په افغانستان کې داعش ډله نشته، خو د ۱۴۰۱ کال د وږي په میاشت کې داعش ډلې په کابل کې د روسیې په سفارت ځانمرګی برید وکړ، چې له امله یې دوه ډیپلوماټان یې ووژل شول.
دا په داسې حال کې ده، چې د روسیې دفاع وزیر تېره اونۍ ددغه هېواد له لوړپوړو پوځي چارواکو سره په کتنه کې ویلي و، چې افغانستان د منځنۍ ختیځ لپاره تر ټولو لوی ګواښ دی.
نوموړي همداراز ویلي و، چې په تېر یوه کال کې د داعش ډلې جنګیالي پنځلس سلنه زیات شوي دي.
