د سوېلي خراسان د پوله ساتونکو قوماندان حسین دهکي وايي، د افغانستان پر پوله د سې شنبې ورځې په جګړې کې لس «ترهګر» ښکېل وو چې له جګړې وروسته افغانستان ته تښتېدلي. صدا و سيما اژانس د ښاغلي دهکي له خولې ليکلي، چې ايران طالبانو ته د دې پېښې په اړه خپل سخت احتجاج څرګند کړی.
دغه ایراني چارواکي څرګنده نه کړه، هغه کسان چې دوی «ترهګر» بللي دي، له کومې ډلې سره تړاو لري.
د سې شنبې په ورځ دولتي خبري اژانس ایرنا دغه کسان د «مخدره توکو د قاچاقبرانو» په توگه یاد کړي وو.
د ایران د پولو ساتو ځواکونو قوماندان له څو ورځو وروسته د دغې پیښې په اړه نوي جزیات وړاندې کړل.
د سوېلي خراسان د پوله ساتونکو قوماندان څرګنده کړه: «يوې ترهګرې ډلې د سې شنبې په ورځ د کب ۱۵مه نيټه پلان درلود چې دغه هيواد ته ننوځي؛ خو د پوله ساتونکو له خوا له مقاومت سره مخامخ شول او وسلې، مهمات او د ترهګریز وسایل یې پاتې شول او دوی د افغانستان خاورې ته وتښتيدل.»
د ایران پوله ساتو ځواکونو په دغه نښته کې د ایران د پوله ساتو ځواکونو د یوې پوستې د قوماندان وژل کېدو پخلی کړی.
په ورته وخت کې، حسین دهکي داد له طالب چارواکو سره د ایران د پوله ساتو ځواکونو د ناستې خبر ورکړی دی.
هغه وویل چې د ایران د پوله ساتو ځواکونو او د طالبانو ترمنځ په لیدنه کې «ایران له خپل لوري سخت احتجاج واوراوه.»
د ایران پولو ساتونکو له طالبانو سره په لیدنه کې ټینګار کړی چې دغه ډله «مجبوره ده چې د ګډو پولو ساتنه او پالنه وکړي».
طالبانو تر اوسه په دې اړه څه نه دي ویلي.
