د بدخشان ولایت یو شمېر اوسیدونکي له طالبانو غواړي، چې د ښځو او نجونو په وړاندې د ښوونځيو او پوهنتونونو دروازې پرانیزي. دغه غوښتنه په بدخشان کې د کتابونو د یوه نندارتون د پرانیستې پر مهال شوې.
د بدخشان اوسېدونکو دا څرګندونې د یکشنبې په ورځ (د کب ۱۹مه) د دغه ولایت په مرکز فیض اباد ښار کې د «راځئ کتاب ولولئ» تر عنوان لاندې د کتابونو د یوه درې ورځني نندارتون د پرانېستلو پر مهال وکړې.
د طالبانو تر واک لاندې باختر خبري اژانس لیکلي، چې دغه نندارتون د بدخشان په مرکز فیض اباد ښار کې د کتاب لوستنې دود د پیاوړتیا او بډاینې په موخه جوړ شوی دی.
د راپور له مخې، په یاد نندارتون کې تاریخي، ادبي، سیاسي، دیني، فرهنګي او د نورو بېلابېلو برخو سلګونه ټوکه کتابونه په کې نندارې ته اېښودل شوي دي.
دا نندارتون په داسې حال کې جوړیږي چې طالبانو د هېواد په کتابوتونو او پوهنتونو کې پر ځینو کتابونو بندیزونه لګولي.
د طالبانو د لوړو زدهکړو وزارت د لیندۍ میاشتې په ۲۳مه د هېواد خصوصي پوهنتونونو ته سپارښتنه کړې وه، چې له خپلو کتابتونونو هغه کتابونه راټول کړي چې د "حنفي فقهې" خلاف دي.
د یادولو ده، چې طالبانو روان کال په کابل او ولایتونو کې د داسې کتابونو د راټولولو بهیر پیل کړی و، چې دوی یې منع ګڼي.
د طالبانو استخبارات چې له یوه نوملړ سره کتابتونونو ته تللي و، یو شمېر کتابونه یې هم مصادره کړي او دا لړۍ لا دوام لري.
تر دې وړاندې افغانانو او د اسلامي هېوادونو په ګډون لسګونو نړېوالو سازمانونو له طالبانو غوښتي چې د نجونو پر روزنیزو چارو خپل بندیزونه لرې کړي، خو طالبانو تر اوسه هم په دې برخه کې کوم ګام نه دی اخیستی.
