د افغانستان کرېکټ ملي لوبډله نن د اېرلنډ پر وړاندې خپله درېیمه یو ورځنۍ لوبه کوي. دغه لوبه د افغانستان پر وخت ۴بجې په شارجه کرېکټ نړۍوال لوبغالي کې ترسره کېږي. افغانستان د اېرلنډ پروړاندې خپله لومړۍ یو ورځنۍ لوبه د ۳۵ منډو په توپیر ګټلې وه او دویمه بیا د باران له کبله لغوه شوه.
د دغو لوبو لپاره د افغان لوبډلې په نوملړ کې د بلال سمیع، حشمت الله شهیدي، ابراهیم ځدراڼ، ریاض حسن، عظمت الله عمرزي، ګلبدین نایب، محمد نبي، نوید ځدراڼ، رحمت شاه، شاهدالله، ضیاالرحمن، اکرام علي خېل، رحمان الله ګربز، الله غضنفر، فرید احمد ملک، فضل الحق فاروقي، ننګیالي خروټي، نور احمد لکڼوال او د قیس احمد نومونه شامل دي.
راشدخان د ملا د عملیات او مجیب الرحمان د لاس د ټپونو له امله په استراحت کې دي او په دغو لوبلړۍ کې نه لوبېږي.
په دغو لوبو کې د افغان لوبډلې لوبډلمشر حشمت الله شهیدي او د اېرلنډ لهخوا به پاول سټرلېنګ لوبډلمشر وي.
افغانستان تراوسه، له اېرلنډ سره ۳۰ یو ورځنۍ لوبې کړې دي، چې په دغو لوبو کې ۱۶ بریاوې، ۱۳ماتې او یوه هم بې پایلې اعلان شوې وه.
تر یو ورځنیو لوبو وروسته افغانستان د اېرلنډ پر وړاندې درې شل اوریزه لوبې هم لري، چې د روانې مارچ میاشتې تر پایه به دوام وکړي.
تر دې وړاندې اېرلنډ له افغانستانه یوازینۍ ټېسټ لوبه په شپږو وېکټو ګټلې وه.
