امریکایي سناتوران: د افغانانو لپاره دې د کډوالۍ د ویزو شمېر زیات شي
د امریکا ۱۲ جمهوري غوښتونکو او ډیموکراټو سناټورانو د کانګرس له لوړ پوړو چارواکو وِغوښتل، چې د هغو افغانانو لپاره دې د کډوالۍ ویزو شمېر زیات کړي چې د امریکا له دولت سره یې کار کړی و.
د امریکا ۱۲ جمهوري غوښتونکو او ډیموکراټو سناټورانو د کانګرس له لوړ پوړو چارواکو وِغوښتل، چې د هغو افغانانو لپاره دې د کډوالۍ ویزو شمېر زیات کړي چې د امریکا له دولت سره یې کار کړی و.
دغو سناتورانو وویل، چې د سږني مالي کال تر پایه هغوی ته ۲۰ زره نورې ویزې په کار دي.
د اسوشیټېد پرېس له قوله چې دغه لیک یې تر لاسه کړی، سناتورانو کانګرس ته ویلي چې «دغه پروګرام د هغو زرګونو افغانانو ژوند ژغورلی، چې په مېړانه یې په افغانستان کې د امریکایي ډیپلوماټانو او ځواکونو سره کار کړی.»
دغه غوښتنه داسې مهال شوې، چې د رویټرز خبري اژانس راپور ورکړی چې د (اېس ای وي) ویزې ښایي د روان کال تر پایه بندې شي.
د امریکا د ولسمشر جوبایډن حکومت هم له کانګرسه غوښتي، چې په کارونو کې چټکتیا راولي.
د ملي امنیت شورا ویاند جان کربي د پنجشنبې په ورځ خبریالانو ته وویل:« که څه هم چې په افغانستان کې زموږ جګړه پای ته ورسېده؛ خو له هغو خلکو سره زموږ ژمنې پای ته نه دي رسېدلي چې په دغه جګړه کې یې زموږ سره مرسته کړې.»
د کډوالۍ (اېس ای وي) ویزې په شرایطو برابرو افغانانو ته اجازه ورکوي، چې د خپلو کورنیو سره په امریکا کې د مېشتېدو لپاره غوښتنه وکړي.
دغه افغانان هغه کسان دي، چې پخوا د پوځي ځواکونو سره یې د ژباړنو او یا هم د امریکا په سفارت کې کار کړی وي.
که څه هم چې دغه پروګرام له ۲۰۰۹ کال راهیسې روان دی؛ خو په افغانستان کې د طالبانو له واکمنېدو وروسته یې د غوښتونکو په شمېر کې پام وړ زیاتوالی راغلی.
د ډیموکراټ ګوند یو سناتور کرېس کونز اسوشیټېد پرېس ته وویل:« د هرې ورځې په تېرېدو سره موږ د خپلو همکارانو ژوند له ګواښ سره مخامخ کوو، په داسې حال کې چې هغوی د مهربانۍ وړ دي.»
د امریکا د بهرنیو چارو وزارت څه موده وړاندې وویل، چې د دغه پروګرام له پیله له ۲۰۲۱ کال څخه تر اوسه د زرګونو افغانانو لپاره ویزې ورکړل شوې او د غوښتنلیکونو ۳۰ سلنه ارزول شوي دي.
د امریکا د بهرنیو چارو وزارت ویاند هم پخوا ویلي و، چې ۸۰۰۰ د اېس ای وي ویزې پاتې دي او د بهرنیو چارو وزارت له کانګرسه غوښتي چې په دغه شمېر کې نور زیاتوالی هم راولي.
خو یو شمېر نیوکه کوونکي وایي، چې د کډوالۍ د غوښتنلیکونو د ارزولو بهیر ډېر مټه روان دی او غوښتونکي یې د سختو ستونزو او له خطرناک حالت سره مخامخ دي.
