ډان ورځپاڼې د پاکستان د پولیسو د یوه افسر له قوله راپور ورکړی، چې په پاړه چنار کې د پاکستاني پوځ او افغان طالبانو ترمنځ د ډېورنډ کرښې په اوږدو کې د نښتې پر مهال د پاکستان د پوځ یو سرتېری وژل شوی او دوه نور ټپیان شوي دي. پاکستاني چارواکي مظهر جهان ویلي، چې نښته اوس هم روانه ده.
دغې انګلیسي ژبې پاکستاني رسنۍ د دوشنبې په ورځ (د کب ۲۸مه) راپور ورکړ، چې د پاکستان امنیتي ځواکونه په تیارسئ حالت کې دي او د سیمې په ټولو روغتونونو کې "بېړنۍ حالت" اعلان شوی دی.
دې ورځپاڼې د پاکستان په شمال لوېدیځ کې د کرمې ولسوالۍ د پولیسو د یوه افسر مظهر جهان له قوله لیکلي، چې په دې سیمه کې ځايي قومي مشران هم له پاکستاني ځواکونو سره همکاري کوي.
له ډان ورځپاڼې سره په خبرو کې یو قومي مشر جلال بنګښ پر افغانستان د پاکستان د بریدونو په اړه د طالبانو څرګندونې رد کړې دي.
د ډېورنډ کرښې په اوږدو کې د برکي سیمې اوسېدونکو رسنیو ته ویلي، چې د پولې دواړو غاړو ته خلک له خپلو کورونو کډه کوي.
د طالبانو د بهرنیو چارو وزارت وايي، چې پر پکتيکا او خوست ولایتونو د پاکستان له هوایي بريد وروسته يې د پاکستان سرپرست سفير احضار کړی او احتجاجیه لیک يې ورته سپارلی دی. د طالبانو بهرنیو چارو وزارت ويلي، چې پاکستان دې د ناسمو پاليسو په ترسره کولو اړيکې نه پېچلې کوي.
د طالبانو بهرنيو چارو وزارت نن دوشنبه (د کب ۲۸مه) په يوې خبرپاڼې کې د افغانستان پر پکتيکا او خوست ولايتونو د پاکستان هوایي بريد غندلی.
د طالبانو بهرنيو چارو وزارت پاکستان ته په خطاب کې ويلي: « موږ پاکستان ته وریادوو، چې د افغانستان اسلامي امارت د نړۍ د زبرځواکونو پر خلاف د ازادۍ د اوږدې مبارزې تجربه لري او پر خپله خاوره تېری په هېڅ ډول نه شي زغملی.»
د طالبانو د بهرنیو چارو وزارت د پاکستان له نوي حکومت او ولس څخه غوښتي، چې د ځينو کړيو د ناسمو کړونو له کبله دې اړيکې نه پېچلې کوي.
په خبرپاڼه کې ويل شوي، چې په برید کې ښځې او ماشومان وژل شوي او دا بريد تېری بلل شوی دی.
په ورته وخت کې د پاکستان د بهرنیو چارو وزارت پر طالبانو غږ کړی، چې د ترهګرو له ملاتړه لاس واخلي او زیاته کړې یې ده، چې پر افغانستان یو شمېر واکمن د ټي ټي پي ملاتړ کوي او دغه ډله د یوې نیابتي ډلې په توګه کاروي.
تر دې وړاندي د طالبانو ویاند ذبیح الله مجاهد ويلي، پر افغانستان د پاکستاني الوتکو له لوري په ترسره شويو بریدونه کې د درېیو ماشومانو په ګډون اته ښځې وژل شوې دي.
طالبانو پاکستان ته ګوتڅنډنه کړې چې که دا ډول بریدونه دوام وکړي، پاکستان ته به بدې پایلې ولري.
بل لوري بيا د طالبانو د دفاع وزارت په لومړي ځل د دې ډلې د دفاع د وزیر ملا یعقوب انځور د پوځ د یوه جنرال په یونیفورم کې خپور کړ.
د دې عکس په خپرولو سره؛ دفاع وزارت ویلي، چې د "پاکستان د تېري" په ځواب کې یې د "فرضي کرښې په اوږدو کې" د پاکستان هېواد په پوځي مرکزونو برید وکړ.
د افغانستان پر خاوره د پاکستان د برید وروسته د پاکستان د بهرنیو چارو وزارت وايي، چې د افغانستان یو شمېر واکمنان په فعاله توګه له ټي ټي پي څخه ملاتړ کوي او دغه ډله د یوې نیابتي ډلې په توګه د پاکستان پر ضد کاروي.
د پاکستان د بهرنیو چارو وزارت نن دوشنبه (د کب ۲۸مه) په یوې خبر پاڼې کې ویلي، چې په تېرو دوو کلونو کې یې څو ځله طالبانو ته په افغانستان کې د ټي ټي پي ډلې د غړو د موجودیت په اړه خپلې جدي اندېښنې څرګندې کړې وې.
اعلامیه زیاتوي، چې دا چاره د پاکستان امنیت ته لوی ګواښ دی او په دوامداره توګه ټي ټي پي د افغانستان خاوره د پاکستان پر ضد کاروي.
په اعلامیه کې راغلي، چې پاکستان څو ځله له طالبانو غوښتنه کړې، چې د ټي ټي پي مشران پاکستان ته وسپاري او دغې ډلې ته خوندي پټنځای ور نه کړي.
په اعلامیه کې ویل شوي، چې دا ډول چارې په تېرو څو لسیزو کې د افغانستان سره د پاکستان د شوي ملاتړ له پامه غورځول دي.
اعلامیه زیاتوي: "موږ په افغانستان کې له واکمنو غواړو، چې د ترهګرو سره د یوځای کېدو پر پالیسۍ باندې له سره غور وکړي".
د پاکستان د بهرنیو چارو وزارت افغان پر افغان طالبانو غږ کړی، چې دوی دې د پاکستان د خلکو او ټي ټي پي تر منځ یو انتخاب وکړي.
د بهرنیو چارو وزارت په اعلامیه کې راغلي، چې د پاکستان د نننۍ ورځې د برید موخه د افغانستان په خاوره کې د ټي ټي پي د یوه مهم قوماندان حافظ ګل بهادر ډلې غړي وو، چې په پاکستان کې په ګڼو بریدونو کې لاس لري.
بل خوا د طالبانو د بهرنیو چارو وزارت په کابل کې د پاکستان شارژدافیر احضار کړی او خپل احتجاجیه لیک یې د پاکستان دغه ډېپلوماټ ته سپارلی دی.
د طالبانو ویاند ذبیح الله مجاهد بیا پر افغانستان د پاکستاني الوتکو له لوري ترسره شوي بریدونه په کلکو ټکو غندي او وايي، چې په دغو بریدونو کې د درېیو ماشومانو په ګډون اته ښځې وژل شوې دي.
دغه بریدونه نن سهار وختي په خوست او پکتیکا کې شوي دي.
د دغې ډلې وياند ذبیح الله مجاهد په یوه خپره شوې خبرپاڼه کې ويلي، چې د پکتیکا برمل ولسوالۍ په لمن کلي کې پر یوه کور د هوايي برید له امله درې ښځې او درې ماشومان وژل شوي او د خوست ولایت سپېرې ولسوالۍ په افغان دوبۍ کلي کې پر یوه کور د هوايي برید له امله دوه ښځې وژل شوې دي.
طالبانو پاکستان ته ګوتڅنډنه کړې چې که دا ډول بریدونه دوام وکړي، پاکستان ته به بدې پایلې ولري.
ایراني رسنیو د سیستان - بلوچستان ولایت په هرمند سیمه کې د زابل د سرحدي ساتونکو د قطعې د یوه سرتېري د وژل کېدو خبر ورکړی دی. د راپورونو له مخې؛ دغه سرتېری د یکشنبې په شپه (د کب ۲۷مه) د نامعلومو کسانو له خوا وژل شوی دی.
د سیستان - بلوچستان د سرحدي ساتونکو د معلوماتو مرکز د دوشنبې په ورځ (د کب ۲۸مه) اعلان وکړ، چې د زابل د سرحدي ساتونکو د قطعې یو سرتېری د ایران په جنوب ختیځه پوله کې د دندې د ترسره کولو پر مهال وژل شوی دی.
دغه مرکز په یوه اعلامیه کې لیکلي، چې دغه سرتېری محمد جواد بیاني نومېده او په ډزو وژل شوی دی.
د ایران خبری اژانس ایرنا خبر ورکړی، چې دغه عسکر د کرمان ولایت د جیرفت د کلي اوسېدونکی دی.
ایراني چارواکو د دې پېښې په اړه نور څه نه دي ویلي.
د سیستان - بلوچستان ولایت چې له افغانستان او پاکستان سره ګډه پوله لري وخت ناوخت د جګړو شاهد وي.
په تېره مياشت کې د ايران په ختيځو پولو کې د ايران د ځواکونو او ملېشو ترمنځ په نښته کې دوه وسله وال ووژل شول.
د افغانستان پخواني ولسمشر او د جمهوري نظام د بهرنیو چارو وزير په خپلو بېلابېلو څرګندونو کې د پکتيا او خوست په سيمو کې د پاکستان هوايي بريدونه د نړۍوالو معیارونو سره په ټکر کې بللي. حامد کرزي او حنيف اتمر له پاکستان څخه غوښتي، چې د ترهګرۍ او بې ثباتۍ له ملاتړه دې لاس واخلي.
د افغانستان پخواني ولسمشر حامد کرزي نن دوشنبه پر افغان خاوره د پاکستان د هوايي بريدونو وروسته پر خپله اېکس پاڼه د غندنې ترڅنګ ليکلي، چې د پاکستان دا بريدونه له ځمکنۍ بشپړتيا ښکاره سرغړونه ده.
هغه دا ډول کړنې د دواړو هېوادونو په زيان وبللې او په سيمه کې د سولي او ثبات د تامين لپاره یې د اسلام اباد په تګلارو کې د بدلون غوښتنه کړې.
د افغانستان د جمهوري نظام د بهرنيو چارو وزير حنيف اتمر د پاکستان په هوايي بريد کې د بې ګناه خلګو وژل د کرکې وړ او د بې ثباتۍ په معنا ياد کړي.
نوموړي پر خپل اېکس پاڼه د پاکستان پوځ ته په پيغام کې ليکي: «د پاکستان پوځ باید هوښیارتیا وښيي چې په سیمه کې د ترهګرۍ او بې ثباتۍ پر وړاندې د مبارزې تر ټولو اغېزمنه لار دا ده چې د هغه ملاتړ ودروي.»
اتمر پر طالبانو هم غږ کړی، چې د خلکو له يوالي او ملي مشارکت پرته د هېواد دفاع کول ناممکن دي.
نوموړي له طالبانو غوښتي، چې د خلکو د ازادې ارادې او مشارکت پر بنسټ مشروع نظام جوړ کړي.
سیمه ییزو سرچینو افغانستان انټرنشنل - پښتو ته ویلي، چې د پاکستان هوايي ځواک د افغانستان په پکتیکا او خوست ولایتونو کې بریدونه کړي.
د طالبانو وياند ذبیح الله مجاهد په یوه خپره شوې خبرپاڼه کې ويلي، چې د پکتیکا برمل ولسوالۍ په لمن کلي کې پر یوه کور د هوايي برید له امله درې ښځې او درې ماشومان وژل شوي او د خوست ولایت سپېرې ولسوالۍ په افغان دوبۍ کلي کې پر یوه کور د هوايي برید له امله دوه ښځې وژل شوې دي.
طالبانو پاکستان ته ګوتڅنډنه کړې چې که دا ډول بریدونه دوام وکړي، پاکستان ته به بدې پایلې ولري.
د طالبانو د دفاع وزارت بيا ویلي؛ د دغه وزارت اړوند سرحدي ځواکونو د ډیورنډ کرښې په اوږدو کې پر پاکستاني پوستو ځوابي بريدونه کړي او د سهارنیو هوايي بریدونو غچ یې اخیستی.
د لومړي ځل لپاره د طالبانو د دفاع وزارت د دې ډلې د دفاع د وزیر ملا یعقوب انځور د پوځ د یوه جنرال په یونیفورم کې خپور کړ. د دې عکس په خپرولو سره؛ دفاع وزارت ویلي، چې د "پاکستان د تېري" په ځواب کې یې د "فرضي کرښې په اوږدو کې" د پاکستان هېواد په پوځي مرکزونو برید وکړ.
په انځور کې لیدل کېږي، چې ملا یعقوب یونیفورم اغوستی او پر اوږه یې پوځي نښانونه دي.
د طالبانو د دفاع وزارت اعلان وکړ، چې د دې ډلې د پوځ سرحدي ځواکونو د پاکستان د تېري په ځواب کې "د فرضي کرښې په اوږدو کې د یاد هېواد پوځي مرکزونه د درنو وسلو" په نښه کړي دي.
وزارت ویلي، چې ځواکونه یې د "هر ډول تېري" ځواب ورکولو ته چمتو دي.
تر دې مخکې د پکتيا ولايت د ډنډ پټان ولسوالۍ اوسېدونکو د افغانستان انټرنشنل ته خبر ورکړى و، چې د ډېورنډ پر کرښه د طالبانو او پاکستاني پوله ساتو ترمنځ وسله واله نښته شوې ده.
سیمه ییزو سرچینو ویلي، چې دغه نښته د دوشنبې په ورځ (کب ۲۸مه) سهار اوه بجې پیل شوه.
سیمه ییزو رسنیو هم ویلي، چې د ډنډ پټان اوسېدونکو د پاکستان له لوري د توغندي له توغولو وروسته خپل کورونه پرېښي دي.
دغه وسله واله نښته د پاکستان د هوايي ځواکونو له خوا په خوست او پکتيکا ولايتونو کې په هدفونو له بمبار وروسته رامنځته شوه.
تر دې وړاندې د طالبانو ویاند ذبیح الله مجاهد په یوه خبرپاڼه کې اعلان کړی و، چې په خوست او پکتیکا کې د پاکستان په هوايي بریدونو کې شپږ تنه وژل شوي، چې درې یې ښځې او درې یې ماشومان دي.
طالبانو خبرداری ورکړی، چې د دغو بریدونو دوام به ډېرې داسې پایلې ولري، چې د پاکستان له کنټروله بهر دي.
سیمه ییزو سرچینو افغانستان انټرنشنل ته ویلي، چې د دوشنبې په سهار د پاکستان هوايي ځواکونو په خوست او پکتیکا ولایتونو کې د تحریک طالبان پاکستان مرکزونه په نښه کړل.
د سرچينې د معلوماتو له مخې؛ دغه بريدونه نن سهار شاوخوا درې بجې د خوست ولايت په سپېره ولسوالۍ او د پکتيکا ولايت په برمل ولسوالۍ کې شوي دي.
