د اسرییل پوځ د سې شنبې په ورځ (د کب ۲۹مه) اعلان وکړ، چې د دغه هېواد ځواکونو د غزې ښار په شفا روغتون کې په خپلو تازه عملیاتو کې له ۵۰ ډېر حماس وسله وال وژلي دي. په دې عملیاتو کې له حماس ډلې سره د تړاو په تور شاوخوا ۱۸۰ تنه نیول شوي دي.
په شفا روغتون کې د اسرايیلي پوځ عملیات د دوشنبې په ورځ پیل شوي او لا هم دوام لري.
اسراییل وايي؛ حماس د خپلو ترهګریزو اهدافو د پرمخ بیولو لپاره له ملکي ځایونو لکه؛ ښوونځي، جوماتونو، روغتونونو او د استوګنې له ودانیو کار اخلي.
ټایمز اف اسراییل خبري ویب پاڼې د غزې په نورو برخو کې د نښتو د دوام خبر ورکړی.
د دغه رپوټ له مخې؛ په تېرو ۲۴ ساعتونو کې د غزې په تړانګه کې د اسرایيل په حملو کې د حماس څو غړي وژل شوي دي.
اسرايیلي پوځیانو د غزې په جنوب کې د خان یونس ښارګوټي په القارا سیمه کې د حماس مرکزونه په نښه کړي دي.
د سې شنبې په ورځ د غزې په شمال کې د نښتو په ترڅ کې یو اسرايیلي پوځي افسر هم وژل شوی دی.
تر اوسه پورې په غزه کې د اسراییل د ځمکنیو عملیاتو له پیل راهیسې د وژل شویو اسرايیلي پوځیانو شمېر ۲۵۱ تنو ته رسېدلی دی.
