د بلوچستان د اطلاعاتو وزیر جان اڅکزی په کندهار کې پر نوي کابل بانک برید ته په اشاره وايي، طالبانو ماران ساتلي اوس یې خوري. د کندهار ښار لومړۍ ناحیه کې نن سهار دا برید هغه مهال وشو چې د طالب نظامیانو په ګډون ولسي وګړي هم د پیسو اخیستلو لپاره د بانک د دروازې مخ ته ټول شوي وو.
جان اڅکزی د دغه برید په یادولو سره خپل اېکس کې زیاتوي: "دا د کندهار په نننۍ چاودنه کې ثابته شوه. ماران په خپلو مالکانو رحم نه کوي. "
پاکستان او افغان طالبان یو بل خپلو مخالفو وسلوالو ته په ځای ور کولو تورنوی.
اسلام اباد وايي، افغان طالبانو تحریک طالبان پاکستان ته پنا ور کړې او د تېر میلادي کال په وروستۍ نېټه د طالبانو دفاع وزیر هم وویل چې په افغانستان کې ډېرې بریدونه پاکستاني او تاجکستاني وګړو کړي دي.
طالبانو ته نږدې رسنۍ هم وايي، چې پاکستان د دوی پرضد داعش ساتي.
د طالبانو کورنیو چارو وزارت د کندهار برید مسوولیت هم د داعش پر غاړه اچوي، چې دوی یې خوارج بولي.
په کندهار کې د طالبانو د امنیه قومندانۍ ویاند اسدالله جمشېد وايي، په برید کې درې کسان وژل شوي او ۱۲ ټپیان دي.
نوموړی وایي، دې برید کې ډېره مرګ ژوبله ولسي وګړو ته اوښتې ده.
له بلې خوا سرچینو افغانستان انټرنشنل پښتو ته په خبرو کې ویلي چې دغه ځانمرګي برید کې ۱۷ کسان وژل شوي او ۴۰ ټپیان دي.
لا هم د دې برید مسوولیت کومې ډلې نه دی منلی، خو په تېر کې د طالبانو پرضد ځانمرګي بریدونه داعش کړي دي.
که څه هم طالبان وايي، داعش یې په افغانستان کې له منځه وړی، خو کله کله په مختلفو ولایتونو د دې ډلې د غړو د وژلو او نیولو خبره کوي.
