د افغان ښځو په چارو کې د امریکا ځانګړې استازې د نجونو له شتون پرته د ښوونیز کال پیل غمجن بولي او وايي، چې د افغان مېرمنو پر وړاندې د طالبانو تبعیضي چلند افغانستان بې وزله او محتاجه کوي. رينا اميري ویلي، چې نړۍ غواړي د طالبانو له خوا د نجونو پر زده کړو بنديزونه لرې شي.
رینا امیري د شنبې په ورځ پر اېکس ټولنیزې شبکې خپور کړي پیغام کې پر افغان ښځو او نجونو د زده کړو د بندیز د دوام په اړه غبرګون کې د طالبانو دغه پرېکړه د افغانستان د ۵۰ سلنه نفوس د ظرفیت له منځه وړل بللي.اغلې امیري یو ځل بیا ټینګار کړی، چې پر افغان ښځو د دغو بندیزونو او محدودیتونو دوام به افغانستان مرستو پورې تړلی وساتي او د جبري کډوالی کچه به هم لوړه کړی.
په افغانستان کې دا دریم ښونیز کال دی چې له شپږم ټولګي څخه پورته د نجونو له شتون پرته پیلیږي.
د ښځو پر زده کړو او کار د طالبانو د بندیزونه د لرې کولو په اړه د نړۍ له پرله پسې غوښتنو سربیره، دغه ډله لا هم په خپل دریځ ولاړه ده. د شپږم ټولکي پورته د نجونو له شتون پرته د نوي ښوونیز کال پیلیدو یو ځل بیا نړیوال غبرګونونه راوپارولي دي.
د بښنې نړیوال سازمان په افغانستان کې د نجونو د ښوونځیو د سمدستي پرانیستلو غوښتنه کړې او له طالبانو یې غوښتي چې د نجونو پر زده کړو بندیز ته د دوام ورکولو لپاره دې "دروغجنې پلمې" پای ته ورسوي.
افغانستان کې د ملګرو ملتونو د مرستندویه پلاوي دفتر (یوناما) د نجونو پر زده کړو بندیز "بې دلیله او زیانمنونکی" بللی دی.
تر دې وړاندې د ماشومانو لپاره ملګرو ملتونو وجهي صندوق یا یونیسف اعلان کړی و، چې د طالبانو د محدودیتونو له امله ۸۰ سلنه نجونې له زده کړو بې برخې شوي دي. دغه سازمان وايي، چې له زده کړو بې برخې شوو نجونو شمیر دوه نیم میلیونه کسانو ته رسيدلی دی.
