د طالبانو پوهنې وزارت وايي، په لوګر، هلمند او بغلان کې یې له هغو طالبانو ازموينه واخيسته، چې په جګړو کې بوخت وو او زدکړو ته یې وخت نه درلود. د دې وزارت په خبرپاڼه کې راغلي، چې د سويې دغه ازموينه یې د لسم، يوولسم او دولسم ټولکيو کې د جذب لپاره اخيستې ده.
د طالبانو پوهنې وزارت نن په خبرپاڼه کې زیاتوي، چې د ازموينې برخوال مخکي په «جهادي فعاليتونو» بوخت او له زدکړو پاتې وو، خو اوس به خپلو زدکړو بشپړولو ته دوام ورکړي.
طالبانو په ډېرو ولایتونو کې د ښوونځيو د لوړو ټولګيو لپاره له خپلو پخوانیو وسلوالو د سويې ازموينې اخيستې دي.
د نوي تعليمي کال په لومړۍ ورځ د پروان ولایت د طالبانو د پوهنې رييس ويلي و، چې له ۹ څخه تر ۱۲ ټولګيو پوري به زر «مجاهدین»- چې منظور یې د دې ډلې پخواني وسلوال وو- ثبت او شامل کړي.
طالبانو نږدې دوه اونۍ وړاندې په ننګرهار کې خپلو پخوانیو درې زره وسلوالو په ښوونځيو کې د جذب لپاره د سويې ازموينه اخيستې وه.
د طالبانو د ننګرهار د رسنیو دفتر ويلي، چې د دغو طالبانو د وړتیا تر ارزولو وروسته به دوی په لسم، یولسم او دولسم ټولګیو کې کېنول شي.
