د طالبانو تر کنټرول لاندې د افغانستان د عامې روغتیا وزارت وايي، تېر کال تر وړم کال د شري ناروغۍ پېښې ۴۵ سلنه کمې شوې دي. د دغه وزارت ویاند وايي تېر کال یې د بشري ناروغۍ د مخنوي لپاره په ټول هیواد کې د شري ناروغۍ واکسین تطبیق کړی دی.
دا په داسې حال کې ده، چې طالبانو د واکسین د تطبیق په اړه جزیات نه دي خپاره کړي، چې د شري ضد واکیسن په کومو ولایتونو کې تطبیق شوی دی.
د طالبانو تر کنټرول لاندې د عامې روغتیا وزارت ویاند شرافت زمان د دغه وزارت په وېپ پاڼه کې نن د ویډیوي پېغام خپرولو سره وویل، چې وړم د شري ناروغۍ ۲۵ زره مثبت پيښې ثبت شوې وې؛ خو تېر کال چې څلور ورځې مخکې پای ته رسېدلې دغه پيښې شاوخوا ۱۱ زره ته را کمې شوې دي.
د نوموړي پر وینا دا په داسې حال کې ده، چې نړيوالو ادارو سږکال اندېښنه ښودلې وه، چې د شري یا هم سرخګانو ناروغۍ ګراف به زیات شي.
د طالبانو د عامې روغتیا وزارت ویاند له خلکو غواړي، چې د کورنۍ کوم غړي ۴یې د شري ناروغۍ نښې ولري، باید نژدې روغتیايي مرکز ته مراجعه وکړي؛ ترڅو ژر یې درملنه وشي او له مرګه وژغورل شي.
د طالبانو د عامې روغتیا وزارت په داسې حال کې د شري یا د سرخکانو د ناروغۍ د کمېدو ادعا کوي، چې د روغتیا نړیوال سازمان د روان کال د مارچ په پیل کې اندېښنه ښودلې وه، چې په تېرو دوه میاشتو کې په افغانستان کې د شري ناروغانو شمېر زیات شوی دی.
دغه سازمان راپور ورکړی وه، چې ۷۰ سلنه ناروغان له پنځو کلنو کم عمره ماشومان دي.
