په کابل کې دوه باوري سرچېنو افغانستان انټرنشنل ته وویل، طالبانو د جمعې په ورځ د عدالت او پرمختګ ګوند مشر جواد حسیني او د هغه د دفتر مشر جعفر جویا په دشت برچي کې نیولي دي. د دغو دواړو د نیولو لامل نه دی په ډاګه شوی.
طالبانو ښاغلی حسیني پخوا هم نیولی و.
د جعفر جویا یو خپلوان افغانستان انټرنشنل ته وویل، چې طالبانو ښاغلی حسیني او د هغه د دفتر رییس د جمعې په ورځ د ماسپښین په درېیو بجو د دشت برچي د حکمت کوڅې په اخر سر کې نیولي دي.
نوموړي وویل، د دغو دوو تنو د نیولو لامل روښانه نه دی او دا هم معلومه نه ده چې طالبانو هغو چېرې بېولي دي.
طالبانو لا تر اوسه د دغه خبر په اړه غبرګون نه دی ښودلی.
تر دې وړاندې د ۱۴۰۱ کال د چنګاښ په میاشت کې هم طالبانو جواد حسیني هغه له خپل کوره نیولی و.
هغه مهال سرچېنو ویلي و، چې طالبانو د هغه پر کور له یرغل وروسته نوموړی یې د مېلمنو سره یو ځای نیولی دی.
د عدالت او پرمختګ ګوند مشر د طالبانو د منتفدینو څخه دی.
هغه تل په افغانستان کې د ټول ګډونه حکومت د رامنځته کېدو او د شیعه مذهبو د حقونو پلوی و او د جعفري فقهې د رسمیت پېژندنې په اړه یې غږ پورته کړی.
ځینو سرچېنو ویلي، چې جواد حسیني او جعفر جویا د عیسی حسیني مزاري د دوسیې د څېړلو غړي دي.
د کابل په لویدیځ کې یو شمېر خلکو له حسینی مزاري څخه طالبانو ته شکایت کړی و، چې نوموړی «افترا» یا تور پورې کړی و چې دغلته سلګونه کلیساوې او «د بدلمنۍ خونې یا فاحشه خانې» شته.
له دغه شکایت وروسته یو ځل ښاغلی حسیني د طالبانو د پولیسو حوزې ته هم غوښتل شوی و؛ خو تر اوسه د هغه په اړه کوم ځانګړی ګام نه دی اخیستل شوی.
