په هلمند کې د طالبانو د والي مطبوعاتي دفتر وايي، د دې ولایت په ګرمسېر ولسوالۍ کې د يوې پخوانۍ مرمۍ د چاودنې له امله درې ماشومان وژل شوي اودوه نور زخميان شوي دي. د دغه دفتر د معلوماتو له مخې، پېښه نن سهار هغه مهال شوې، چې ماشومانو د مرمۍ له موندلو وروسته لوبې پرې کولې.
په خبرپاڼه کې راغلي، چې په وژل شويو کې يوه نجلۍ او دوه هلکان او په زخميانو کې يو نجلۍ او يو هلک شامل دي.
طالب مسولين وايي، زخميان د لښکرګاه ايمرجنسي روغتون ته د تداوی لپاره لېږدول شوي دي.
په دې وروستیو کې په کندهار، هلمند او ننګرهار کې د پخوانيو ناچاوده توکو د چاودنو له کبله د ملکي مرګ ژوبله زياته شوې ده، چې ډېری قربانیان یې هم ماشومان دي.
په تېرو دوو میاشتو کې په کندهار او هلمند کې دا د خپل ډول دریمه پېښه ده.
دوه اونې مخکې د کندهار په پنجوايي ولسوالۍ کې هم يوه پخواني لاسي بم يو کوچني وژلی او دوه ښځې يې ټپي کړې وې.
نږدې دوه اونۍ مخکې د ننګرهار په شېرزادو او خوږیاڼو کې د زړې مرمۍ او نارنجک په چاودنو کې درې ماشومان وژل شوي او د دریو مېرمنو او یوه بوډا په ګډون اته کسان ټپي وو.
