د افغانستان لپاره د بشري حقونو سازمان ځانګړي استازي په کندهار ولایت کې د پنجشنبې د ورځې ځانمرګی برید وغانده. دغه برید د کندهار ښار لومړۍ حوزې ته مخامخ د نوي کابل بانک مخې ته د تېرې پنجشنبې په ورځ شوی و.
ریچارډ بېنټ د شنبې په ورځ (د وري څلورمه) په خپله اېکس پاڼه لیکلي، چې د ورته بریدونو عاملان، تنظیموونکي او مالي ملاتړي باید وپیژندل شي.
د کندهار میرویس روغتون کې سرچینو افغانستان انټرنشنل ـ پښتو ته پرون ویلي، چې په دغه ځانمرګي برید کې ۴۳ تنه وژل شوي او ۴۵ نور ټپيان دي.
د دغه برید مسوولیت داعش ډلې په غاړه اخیستی او وایي، چې دا برید د دغې ډلې یوه غړي معاویه پنجشیري کړی دی.
په هرات ولایت کې د طالبانو امنیه قومندانۍ وایي، چې په تېرو شپږو میاشتو کې یو زر او ۱۲۸ کسان د بېلابېلو جرمونو په تور نیول شوي دي.
دغه امنيتي اداره وايي، چې له ياد شمېر کسانو څخه ٥٢٣ تنه د وسله والو غلاوو، وژنو، د جعلي اسنادو او اختلاس او ٥١٢ تنه نور د نشه يي توکو او الکُولي مشروباتو د پلورلو په تور نیول شوي دي.
په هرات ولایت کې د طالبانو امنیه قومندانۍ د شنبې په ورځ (د وري څلورمه) د یوې خبرپاڼې له لارې د خپلو لاسته راوړنو نوملړ خپور کړی.
د دې خبرپاڼې له مخې، د هرات ولايت د امنيې قوماندانۍ له نشه يي توکو سره د مبارزې رياست په تېرو شپږو مياشتو کې د هرات په ښار او ولسواليو کې ٥٣٦ عمليات کړي او په پايله کې يې ٥١٢ شکمن کسان نيولي دي.
طالبانو ادعا کړې، چې له دغو کسانو څخه يې دوه زره او ۴۷۹ کيلوګرامه نشه يي توکي او ٩٣٨ لېتره الکولي مشروبات نيولي دي.
دغې ادارې همداراز ویلي، چې په تېرو شپږو مياشتو کې په ښار او ولسواليو کې یو زرو ۲۵۷ ټرافيکي پېښې رامنځته شوې، چې په پايله کې يې ٩٧ تنه مړه شوي او ٣٣٩ نور ټپيان شوي دي.
د دغې قوماندانۍ د تروريزم مديريت هم په تيرو شپږو مياشتو کې ١٨ تنه نيولي او له هغوى څخه يې ٧١ ميله بېلابېل ډول وسلې ترلاسه کړې دي.
د دې تر څنګ یادې قوماندانۍ ۵۱ تنه نور د ناقانونه وسلو د ګرځولو په تور نیولي او له دوی څخه وسلې ضبط کړې دي.
د افغان ښځو په چارو کې د امریکا ځانګړې استازې د نجونو له شتون پرته د ښوونیز کال پیل غمجن بولي او وايي، چې د افغان مېرمنو پر وړاندې د طالبانو تبعیضي چلند افغانستان بې وزله او محتاجه کوي. رينا اميري ویلي، چې نړۍ غواړي د طالبانو له خوا د نجونو پر زده کړو بنديزونه لرې شي.
رینا امیري د شنبې په ورځ پر اېکس ټولنیزې شبکې خپور کړي پیغام کې پر افغان ښځو او نجونو د زده کړو د بندیز د دوام په اړه غبرګون کې د طالبانو دغه پرېکړه د افغانستان د ۵۰ سلنه نفوس د ظرفیت له منځه وړل بللي.اغلې امیري یو ځل بیا ټینګار کړی، چې پر افغان ښځو د دغو بندیزونو او محدودیتونو دوام به افغانستان مرستو پورې تړلی وساتي او د جبري کډوالی کچه به هم لوړه کړی.
په افغانستان کې دا دریم ښونیز کال دی چې له شپږم ټولګي څخه پورته د نجونو له شتون پرته پیلیږي.
د ښځو پر زده کړو او کار د طالبانو د بندیزونه د لرې کولو په اړه د نړۍ له پرله پسې غوښتنو سربیره، دغه ډله لا هم په خپل دریځ ولاړه ده. د شپږم ټولکي پورته د نجونو له شتون پرته د نوي ښوونیز کال پیلیدو یو ځل بیا نړیوال غبرګونونه راوپارولي دي.
د بښنې نړیوال سازمان په افغانستان کې د نجونو د ښوونځیو د سمدستي پرانیستلو غوښتنه کړې او له طالبانو یې غوښتي چې د نجونو پر زده کړو بندیز ته د دوام ورکولو لپاره دې "دروغجنې پلمې" پای ته ورسوي.
افغانستان کې د ملګرو ملتونو د مرستندویه پلاوي دفتر (یوناما) د نجونو پر زده کړو بندیز "بې دلیله او زیانمنونکی" بللی دی.
تر دې وړاندې د ماشومانو لپاره ملګرو ملتونو وجهي صندوق یا یونیسف اعلان کړی و، چې د طالبانو د محدودیتونو له امله ۸۰ سلنه نجونې له زده کړو بې برخې شوي دي. دغه سازمان وايي، چې له زده کړو بې برخې شوو نجونو شمیر دوه نیم میلیونه کسانو ته رسيدلی دی.
د افغانستان د اطلاعاتو او کلتور پخواني وزیر د مسکو د برید په غبرګون کې ویلي، چې په سيمه کې د ناامنيو د ډېرېدو له کبله اندېښمن دی. کريم خرم د مسکو پروني بريد يو «ترهګریز عمل» بللی او د قربانيانو شمېر يې لوړ ښودلی دی.
د افغانستان د اطلاعاتو او فرهنګ پخواني وزير عبدالکريم خرم نن شنبه د (وري ۴مه) پر اېکس ټولنیزې شبکې یو پیغام کې د مسکو د بريد لوړې مرګ ژوبلې ته په اشارې سره ویلي، چې د افغانستان خلګ تر بل هر چا ډېر د دا ډول کړونو درد درک کولای شي.
ښاغلي خرم ليکلي، چې په سېمه کې د ناامنيو زياتېدو له امله اندېښمن شوی دی.
هغه زياتوي: « ما مخکې هم ویلي وو، چې که د ناامنيو د مخنيوي لپاره د حل لار په پام کې ونه نیول شي، کار به دغي ځي ته رسیږي»
داعش د مسکو په څنډه کې د کروکوس ښار د کنسرت پر تالار د برید مسوولیت منلی، چې ویل کېږي ۱۴۳ کسان پکې وژل شوي او تر ۱۴۰ ډیر نور ټپیان دي.
د پېښې له ځایه خپرې شوې ویډيوګانې ښيي چې څلور وسلوال تالار ته ننوځي او پر نندارچیانو برید کوي.
د روسیې ولسمشر ولادیمير پوتین وايي، مسکو ته څېرمه په «ترهګریز» برید کې ښکیل ټول کسان به وپیژندل شي او سزا به وګوري.
د روسیې ولسمشر د دې پېښې له قربانیانو سره د خواخوږۍ لپاره سبا ملي ماتم اعلان کړی.
ولادیمیر پوتین د مسکو له وژونکي برید یوه ورځ وروسته په یوه ټلویزیوني وینا کې ویلي، چې اړینه ده، چې د کروکوس د "قتل عام " تر شا د عاملینو د راتلونکو جرمونو مخه ونیول شي.
هغه ټینګار وکړ چې اوس باید ټوله روسیه متحده شي او زیاته کړه چې هېڅوک د روسیې د وګړو یووالی نه شي زیانمنولی.
افغانستان انټرنشنل ـ پښتو په ننګرهار کې د تېرو لسو ورځو د کورني او د ماشومانو پر سر د تاوريخوالي پيښې ثبت کړې، چې پکې ۱۲ کسان وژل شوي او ۱۱ نور زخميان دي. دغه ټولې پېښي د ننګرهار د طالبانو قومندانۍ هم تايد کړې او ويلي یې دی، چې په وژل شويو کې ۴ ښځې هم شاملې دي
افغانستان انټرنشنل ـ پښتو په ننګرهار کې د تېرو لسو ورځو د تاوتريخوالي ۹ پېښې ثبت کړې دي.
د تاوتريخوالي دغږ پېښې تر ډېره د ځمکو او ماشومانو پر سر جنجال، کورنۍ شخړې او ځان وژنې پکې شاملي دي.
دغه پېښې د ننګرهار په سره رود، سپين غر، بټي کوټ، خوګياڼي، هسکه مېنه، کوزکونړ، ګوشتې او جلال اباد ښار په ۸ حوزه کې شوې دي.
په دې پېښو کې د ۴ ښځو په ګډون ۱۲ کسان وژل شوي او د يوې ښځې په ګډون ۱۱ نور زخمیان شوي دي.
د دې پېښو وروستې هغه يې نن شنبه د د سره رود ولسوالۍ په باولۍ سيمه کې د ماشومانو پر سر د دووکسانو جګړه وه.
په ننګرهار کې د طالبانو د امنيه قومندانۍ وياند عبدالبصير زابلی وایي، چې په دې پېښه کې د زرګل په نامه يو کس وژل شوی او وژونکی يې نیولی دی.
د طالب وياند په خبره، په همدې ورځ په سپين غر ولسوالۍ کې د ځمکو د اوبو پر سر يوې کورنۍ د افسر خان په نوم يو کروندګر وژلی.
د زابلي د معلوماتو له مخې، چې بېګاه يو کس د کورني جنجال له امله خپله مېرمن، زوی او انګور وژلي دي.
زابلی وايي، چې تېره جمعه په کوزکونړ کې يوې نجلۍ او تېره چهار شنبه په بټي کوټ ولسوالۍ کې يوه نارينه ځانونه وژلي دي.
د طالبانو د وسلوال پوځ لوی درستيز په کابل کې د کندهار د وروستۍ پیښې له ټپیانو سره د شهيد سردار محمد داود خان روغتون کې وکتل، چې تر ډېره پکې د نظامیانو درملنه کېږي. طالبانو ویل دې برید کې ولسي وګړو ته مرګ ژوبله اوښتې، خو د تلفاتو کره شمېر یې هم خپله اعلامیه کې نه و لیکلی.
د طالبانو د دفاع وزارت نن په اېکس پاڼې لیکلي، الحاج قاري محمد فصیح الدین فطرت د پېښې ټپیانو ته د عاجلې روغتیا هیله وکړه.
کندهار کې د پنجشنبې په ورځ د نوي کابل بانک مخې ته داعش ځانمرګی وکړ.
د کندهار میرویس روغتون کې سرچینو پرون افغانستان انټرنشنل ـ پښتو ته ویلي، چې دغه ځانمرګي برید کې ۴۳ تنه وژل شوي او شاوخوا ۴۵ ټپيان دي.
د سرچینو په خبره، برید هغه مهال وشو چې طالب نظامیان د تنخا اخیستو لپاره د بانک مخې ته کتار شوي وو.
د برید یو شمیر ټپیان د تداوي لپاره کابل ته انتقال شوي دي.
د یادونې وړ ده چې د کابل په شهید سردار محمد داوود خان ۴۰۰ بستره روغتون کې د نظامي ټپیانو درملنه کیږي.
