حکمتیار ته نېږدې سرچینې افغانستان انټرنشنل - پښتو ته ویلي، چې د طالبانو د عدلیې وزیر عبدالحکیم شرعي په حکم په کابل کې د اسلامي ګوند د مشر ګلبدین حکمتیار کور د تخلیې په موخه محاصره شوی دی.
دغې سرچینې زیاته کړې، چې د طالبانو عدلیې وزیر عبدالحکیم شرعي ځکه دا حکم کړی، چې د ښاغلي حکمتیار کور د ملي دفاع وزارت اړوند ځمکه کې جوړ شوی دی.
سرچینه وايي، چې د طالبانو وسله والو له حکمتیار او د هغه د دفتر له غړو غوښتي، چې کور پرېږدي او له دغه ځایه ووځي.
تر اوسه پورې طالبانو هم په رسمي ډول د نوموړي د کور د محاصرې او تخلیې په اړه رسنیو ته څه نه دي ویلي.
طالبانو ته نېږدې سرچینې بیا وايي، چې دوی له ښاغلي حکمتیار څخه غوښتي، چې په دولتي ځمکه کور، دفتر او ورسره غصب کړې ځمکه پرېږدي.
سرچینه زیاتوي؛ د غصب ځمکو راګرځولو کمېسیون یوه پلاوي له حکمتیار څخه غوښتي، چې دولتي ځمکې تسلیم کړي.
په ورته وخت کې حکمتیار ته نېږدې شخص او د اسلامي حزب د رهبرۍ شورا غړي کریم امین ویلي، چې د حکمتیار کور د طالبانو له خوا نه دی محاصره شوی؛ بلکې تصمیم نیول شوی، چې د نوموړي کور او دفتر له دغې سیمې و بلې سیمې ته انتقال کړي.
په دې وروستیو کې د اسلامي حزب رهبر ګلبدین حکمتیار په یوې انلاین غونډه کې د طالبانو د نظام پر ډول، د نجونو پر ښوونځیو او د واک پر انحصار نیوکې کړې وې.
د یادونې وړ ده، چې د اسلامي حزب د مشر ګلبدین حکمتیار کور او دفتر د دارالمان په سیمه کې په ۱۸ جریبه ځمکې کې اباد شوی دی.
دغې سرچینې زیاته کړې، چې دا مهال د محاصرې د علت په اړه د طالبانو له خوا څه نه دي ویل شوي؛ خو د طالبانو یو شمېر وسله وال د نوموړي له ګوره ګېرچاپېره راټول شوي دي.
سرچینه وايي، چې طالبان چا ته د نوموړي کور ته د ننوتلو او راوتلو اجازه نه ورکوي.
تر اوسه پورې طالبانو هم په رسمي ډول د نوموړي د کور د محاصرې په اړه رسنیو ته څه نه دي ویلي.
په دې وروستیو کې د اسلامي حزب رهبر ګلبدین حکمتیار په یوې انلاین غونډه کې د طالبانو د نظام پر ډول، د نجونو پر ښوونځیو او د واک پر انحصار نیوکې کړې وې.
تر اوسه پورې ښاغلي حکمتیار هم په رسمي ډول یاده محاصره نه ده تایید کړې.
