د روسیې ولسمشر ولادیمیر پوتین د مسکو په څنډه کې د کروکس په تالار کې د برید پړه پر «توندلارو اسلامپالو» واچوله. پوتین وویل: «موږ پوهیږو چې دا جنایت د توندلارو اسلامپالو لخوا ترسره شوی او پخپله اسلامي نړۍ له پيړيو راهيسي د دوی له ايډيالوژۍ سره مبارزه کوي.»
ښاغلي پوتین د دوشنبې په ورځ د (وري ۶مه) د خپل هېواد له چارواکو سره په یوه ویډیويي ناسته کې وویل: «متحده ایالات هڅه کوي، چې د بیلابیلو چینلونو له لارې ټول قانع کړي، چې اوکراین په دې «خونړي ترهګریز» برید کې هیڅ رول نه لري او دا برید «د اسلام د پیروانو او په روسیه کې د منع شوي داعش سازمان غړو لخوا ترسره شوی»
هغه د خپل هیواد له چارواکو وغوښتل: «موږ باید دې پوښتنې ته ځواب ووایو، چې ولې ترهګرو له جرم کولو وروسته اوکراین ته د تګ هڅه وکړه؟»
د روسیې ولسمشر وویل، که څه هم موږ پر کروکس د برید عاملین پېژنو، خو موږ غواړو پوه شو چې چا يې امر کړی و؟
ولاديمير پوتين په ورته وخت کې د روسيې د استخباراتي او امنيتي ارګانونو له خوا د توندلارو اسلامي سازمانونو او اوکراین ترمنځ د اړيکو په هکله پر هر اړخيزې څېړنې او تحقیقاتو ټينګار وکړ.
هغه دا پوښتنه وکړه، چې « ایا اسلامي توندلاري او حتی تروریستي سازمانونه، چې د منځني ختیځ د کړکیچ د عادلانه حل پلوي دي، رښتیا هم لېواله دي چې پر روسیې برید وکړي؟
د نوموړي په خبر، هغه توندلاري اسلامپال، چې ځانونه د مومن مسلمانان او د خاص اسلام په توګه معرفي کوي، د روژې په مبارکه میاشت کې څنګه جنایت ترسره کولی شي؟
ښاغلي پوتین د مسکو برید په روسیه کې د خلکو د وېرې او وحشت د رامنځته کولو یوه هڅه ګڼلې او وایي هغه کسان له دې برید ګټه پورته کوي چې له ۲۰۱۴ کال راهیسې د «نیونازي کییف رژیم» په لاس له روسیې سره جګړه کوي.
دا څرګندوني پر داسي مهال کيږي، چې اوکراین ټینګار کړی، چې د مسکو په څنډه کې د کروکس پر تالار په برید کې یې هیڅ رول نه درلود.
داعش د کروکس پر تالارد برید پړه پر غاړه واخيسته او د روسیې د دولتي تاس خبري اژانس د وروستیو معلوماتو له مخې په دې برید کې ۱۳۹ کسان ووژل شول.
روسیې اعلان کړی، چې په کروکس تالار کې د بريد د څلورو مستقیمو عاملینو په ګډون یې یوولس کسان نیولي دي.
د دغو څلورو کسانو لومړنۍ محاکمه د دوشنبې په ورځ د (وري ۶مه) د مسکو په یوه محکمه کې وشوه.
دویټول اوس په موقتي توقیف کې دي ترڅو د دوی د محاکمې لپاره چمتووالی ونیول شي.
د روسیې د ار بي سي خبري اژانس د راپور له مخې، ۳۲ کلن دلرجان میرزایف، ۲۶ کلن فریدون شمس الدین او ۱۹ کلن محمد صابر فیضف د تاجکستان اتباع دي او ۳۰ کلن مراد علي رجب علیزاده په دې قضیه کې تورن دي او د څلورم کس تابعیت نه دی په ډاګه شوی.
