د کانګرس د بهرنیو اړیکو کمیټې مشر د جو بایډن له ادارې غوښتي، چې د طالبانو په بند کې د یوه امریکایي اوسېدونکي رایان کوربت د خلاصون لپاره بېړنی اقدام وکړي. مایکل مکال ویلي، د هغه د بد روغتیایي وضعیت له راپورونو سره، سره د بایډن حکومت د هغه د خلاصون په برخه کې بې غوري کړې ده.
رایان کوربت د ۱۴۰۱ کال په زمري میاشت کې د افغانستان په شمال کې له خپلو درېیو جرمني همکارانو سره ونیول شو.
هغه له ۲۰۱۷ کال راهیسې په افغانستان کې یو سوداګریز شرکت جوړ کړی و.
طالبانو تر دې وړاندې د ښاغلي کوربت د نیونې پخلی کړی و او ویلي یې وو، چې نوموړی «د دولتي ضد کړنو په جرم» نیول شوی دی.
د تېر کال په لېندۍ میاشت کې د ریان کوربت مېرمنې انا کوربت د سيبياېس شبکې سره د خبرو پر مهال ویلي و، چې د طالبانو د استخباراتو په بندخونه کې یې د خاوند روغتیا او ژوند له ګواښ سره مخ دی.
خو د طالبانو استخباراتو سيبياېس شبکې ته ویلي و، چې د ریان کوربت روغتیایي حالت ښه دی او هغه په یوه مېلمستون کې اوسېږي.
د طالبانو د استخباراتو چارواکو ادعا کړې، چې هغه د نورو بندیانو خلاف ازادې هوا، د وزې او پسه غوښې، ورځپاڼو او مجلو ته لاسرسی لري.
مایکل مکال په خپل یوه بیان کې لیکلي، چې د رایان کوربت بد وضعیت له افغانستانه د بایډن د ادارې له «ناورینه ډکه» وتنه یوه غمجنه؛ خو د وړاندوینې وړ پایله وه.
