له مزارشریف ښار څخه ځینو سرچېنو افغانستان انټرنشنل ته وویل، چې د ټکسي موټرو د رنګ بدلولو بهیر د بلخ تر څنګ په جوزجان، سرپل او فاریاب ولایتونو کې هم پیل شوی او طالبانو ویلي، که څوک د دوی له امره سرغړونه وکړي؛ نو د قانون سره سمه سزا به وویني.
په افغانستان کې له لسیزو را په دې خوا ټکسي موټر په ژېړ او سپینو رنګونو خلکو پېژندل او له همدغو رنګونو سره یې اشنايي هم لرله؛ خو طالبان وايي چې دوی په ښارونو کې د نظم د راوستو او امنیت د ټینګښت لپاره دغه کار ترسره کوي.په مزارشریف ښار کې پخوانی ښوونکی چې اوس ټکسي موټر چلوي د نوم د ښودلو په شرط یې افغانستان انټرنشنل ته د ټیلیفون په لیکه وویل: موږ نن سبا په دغه موټر د خپلو ماشومانو ګېډې نه شو مړولای، اوس چې د رنګ د بې ضرورته بدلولو امر شوی حیران پاتې یو چې دغه پیسې ورته له کومه کړو، موږ مجبور یو چې د دې کار لپاره هم پیسې په پور واخلو.د ټکسي موټرو اوسنی رنګ اسماني او سپین ټاکل شوی او له یوه خصوصي شرکت سره یې تړون لاسلیک شوی.د معلوماتو له مخې، د هر موټر په رنګولو ۹۱۱۰ افغانۍ لګښت راځي.
ګڼ خلک وايي، چې تر دې وړاندې د افغانستان په ټولو لویو شارونو کې خلکو ټکسي موټر په ژېړ رنګ لیدلي وو او له دغه رنګ سره یې بشپړه اشنايي هم لرله؛ نو ولې طالبان دې ته اړ شول چې د ټکسي موټرو رنګ دې بدل شي؟ دوی پوښتنه کوي، چې ایا دې سره امنیت خوندي کېدای او د جنايي پېښو کچه راټیټېدای شي؟
تر دې وړاندې په پلازمېنه کابل کې د ټکسي موټرو د رنګ بدلولو لړۍ پیل شوې، چې تر دې مهاله د یو شمېر ټکسي موټرو رنګونه بدل شوي او هغوی چې تر دې مهاله دا کار نه دی کړی د طالبانو لهخوا درول کېږي او له ځورولو، کړولو وروسته جریمه کېږي.
