طالبان وايي، چې ډېر ژر به کابل ته د پنجشیر سیند د اوبو لېږد پیل شي
د طالبانو د انرژۍ او اوبو وزارت چارواکي وايي، چې کابل ته د پنجشیر سیند د اوبو د لېږد پروژې د سروې کار مخ په پای ته رسیدو دی.
د طالبانو د انرژۍ او اوبو وزارت چارواکي وايي، چې کابل ته د پنجشیر سیند د اوبو د لېږد پروژې د سروې کار مخ په پای ته رسیدو دی.
دغه وزارت ویلي، چې د سروې له بشپړېدو سره به ډېر ژر د پنجشېر له مرکز بازارک څخه د کابل تر ترهخېلو سيمې پورې د څه باندې دوه سوه کيلومترو په اوږدوالي د اوبو د لیږد پروژې عملي کار پيل شي.
د طالبانو تر کنټرول لاندې د پنجشیر ملي ټلویزیون ویلي، چې د طالبانو د انرژۍ او اوبو وزارت چارواکو دغه موضوع په پنجشیر کې د دغې ډلې له والي حافظ محمد اغا حکیم سره په کتنه کې مطرح کړې ده.
د طالبانو د انرژۍ او اوبو وزارت یو چارواکي محمد عارف مومند د پنجشیر ملي تلویزیون ته وویل، چې د دې پروژې بودیجه د طالبانو د ادارې له خوا ورکول کیږي. عارف زیاته کړه چې دغه پروژه د دوه متر مکعب اوبو د لېږد ظرفيت لري.
طالبانو ویلي، چې د پنجشیر له سیند څخه کابل ته د اوبو لېږد شاوخوا درې کاله وخت نیسي او د دې پروژې په بشپړېدو سره به د کابل شاوخوا دوه میلیونه اوسېدونکو ته د څښاک اوبه برابرې شي.
طالب چارواکو تېرکال اوړي کې هم کابل ته د پنجشیر سیند د اوبو د لېږد په اړه غونډه کړې وه. په دې ناسته کې د دې پروژې د کار د بهیر پر چټکتیا ټینګار شوی و.
د پنجشېر د اوبو د لېږد پلان په تېر حکومت کې هم تر بحث لاندې و. د راپورونو له مخې، د افغانستان د ۱۳۹۹ کال د بودیجې په سند کې د یو میلیارد افغانیو په ارزښت د کابل ښار لپاره د اوبو رسولو درې مهمې پروژې په پام کې نیول شوې وې، چې کابل ته د پنجشیر د ابو انتقال، د شاه توت بند تجهیزاتو او ځمکې لاندې ابو د ذخیرې پروژې په کې شاملې وې.
په کابل کې د څښاک د اوبو نشتوالی د پلازمېنې اوسېدونکو ته جدي ستونزې جوړې کړي دي. په وروستیو میاشتو کې د کابل په ځینو سیمو کې د څښاک د پاکو اوبو لپاره د ښاریانو اوږده کتارونه په ټولنیزو رسنیو کې په پراخه کچه لیدل شوي دي.
