د ګلبدین حکمتيار زوی د طالبانو د عدليې وزير وروستيو څرګندونو ته په غبرګون کې ويلي، دا د افغانانو بدبختي ده، چې واړه خلګ پر لويو چوکيو ناست او ولس ته د فتح شوي ملت په سترګه ګوري.
حبیب الرحمان حکمتيار وايي، چې د عدل او قانون ادارې مشر په دې نه پوهيږي، چې سرپرستان فيصلي نه شي کولای.
د طالبانو د عدليې وزير مولوي عبدالحکيم شرعي نن په کابل کې يوې غونډې ته ويلي، چې له پخواني استوګنځي په وتلو کې یې حکمتيار ته وخت ور کړی او بل ځای یې ورته برابر کړی، «له دې سره که بیا هم نوموړی دا کار بې احترامي بولي، عقل يې کار نه کوي.»
د حزب اسلامي ګوند د مشر زوی حبیب الرحمان حکمتيار نن شنبه د طالبانو عدليې وزير تر څرګندونو وروسته پر اېکس ټولنیې شبکې یو پیغام کې لیکلي، چې د ادب او بې ادبي په اړه د قضاوت لپاره همدا څو دقيقې خبرې بسنه کوي.
نوموړي ليکي: «دا زموږ بدبختي ده چې يو شمېر واړه خلک په غټو څوکيو ناست دي او افغانانو ته د خپل ولس پر ځای د کوم فتح شوي ملت په سترګه ګوري.»
حبیب الرحمان حکمتيار ليکلي، چې د طالبانو د عدل او قانون د ادارې په مشرۍ کې کسان په خپله خوښه فيصلې کوي.
هغه زياتوي: « د عدل او قانون ادارې مشر په دې نه پوهیږي، چې سرپرستان سرپرستي کوي، نه دا چې فيصلې.»
حکمتيار په افغانستان کې د حزبونو د فعالیت قانوني ختمولو ته د طالبانو د عدليې وزير د خبرو په غبرګون کې ليکلي: « پخواني قوانين لغوه کول او نوي جوړول د يوې قانون سازی مرجعې کار وي نه دا، چې يو شخص يا يو ډله په خپله خوښه دا کار وکړي.»
هغه ليکلي، چې اوسني واکمنان بايد له تېرو تجريبو زده کړه وکړي؛ ځکه تر اوسه لا په دې نه پوهيږي، چې سبا ته به څه پېښ شي.
د طالبانو عدليې وزير ويلي، چې د کور په مسله کې يې د حکمتیار درناوی کړی او د هغه په خوښه يې ځای ورکړی؛ خو په ورته وخت کې يې د حزب اسلامي ګوند مشر ګلبدين حکمتيار ته خبرداری ورکړی، چې د دوی په نظام کې حزبونه ځای نه لري او نوم اخيستل يې جرم دی.
