د جګړې د مطالعاتو انسټیټیوټ په یوه نوي څېړنیز راپور کې لیکلي، چې طالبانو په ډېرو برخو کې د ملاهبت الله له فرمانونو سرغړونه کړې. په راپور کې راغلي، طالبان په بېلابېلو له هغې ډلې د څوو ودونو د ممنوعیت، د خپلوانو د ګومارلو او ناقانونه وژنو په تړاو د خپل مشر فرمانونه مات کړي دي.
دغه انسټیټیوټ د جمعې په ورځ د ( وري په ۱۰مه) په افغانستان کې د طالبانو د حکومتولۍ د څرنګوالي په اړه یو تازه څېړنیز راپور خپور کړی دی.
په دغه څېړنیز راپور کې راغلي، چې د طالبانو مشر او د دغې ډلې لوړپوړي چارواکي د فرهنګي او ټولنیزو سیاستونو په اړه د نظر اختلاف لري.
د راپور په وینا، تر ټولو اړین د نظر اختلاف د نجونو د زدهکړو په تړاو دی چې د طالبانو د کابینې غړو په وار، وار سره په خپلو عمومي ویناوو کې د دغې ډلې د رهبرۍ د پرېکړو په اړه غبرګون ښودلی.
ملا یعقوب، سراجالدین حقاني او عباس ستانکزی هغه چارواکي دي، چې تراوسه پورې یې په خپلو عمومي ویناوو کې د ملاهبت الله پر سیاستونو نیوکې کړې دي.
د دغه راپور په یوې برخه کې راغلي، چې طالب چارواکي د ملاهبت الله له فرمانونو د سرغړونو سره خپلې لوڼې مخفي یا پټو ښوونځیو ته لېږلي دي.
د دغه راپور په حواله، اخوندزاده ډېری فرمانونه صادر کړي چې د زیاتو ښځو کول یې « غیرضروري او اسراف» بللي او هغه یې منعه کړي دي، له دې سره « ډېرو طالب چارواکو د ملاهبت الله له دغه فرمان سره، سره څو، څو ودونه کړي او لا هم دغه لړۍ دوام لري.»
سربېره پر دې د طالبانو غړو د عمومي عفوې په تړاو د خپل مشر د ژمنې په سرغړونې سره د افغانستان د پخواني دولت د کارکوونکو ناقانونه وژنو ته دوام ورکړی.
د دغو برخو ترڅنګ په راپور کې راغلي، چې طالب چارواکو په دولتي څوکیو کې د خپلو خپلوانو په ګومارلو سره د خپل مشر فرمان بابېزه ګڼلی دی.
