د طالبانو د عدليې وزير ويلي، چې په افغانستان کې د قانون خلا نشته او د قوانينو اساس یې «قران او حديث» دي؛ خو د ګلبدين حکمتيار زوی يې په غبرګون کې ليکلي، چې افغانستان اساسي قانون نه لري. د دواړو ترمنځ يو پر بل نیوکې وروسته له هغه پيل شوې، چې طالبانو له دولتي ځمکې حکمتیار واېست.
د طالبانو د عدليې وزير مولوي عبدالحکيم شرعي د ځينو هېوادونو او خلکو دا خبرې ردوي، چې وایي په افغانستان کې اساسي قانون نشته.
شرعي زياتوي: « د الله کتاب (قران کريم)، د رسول الله حدیث او په اجتهادي مسايلو کې حنفي فقه زموږ اساسي قانون دی.»
طالب وزير شرعي وايي، چې د بېلابېلو قوانينو او د دوی د مشر هبت الله اخونزاده د فرمونونو ۵ رسمي جرېدې يې خپرې کړې دي.
د حزب اسلامي ګوند د مشر زوی حبیب الرحمان حکمتيار نن یکشبنه پر خپله اېکس پاڼه د طالب وزير د همدې خبرو په غبرون کې ليکلي، چې په افغانستان کې د اساسي قانون تشه شته.
حکمتيار د طالبانو د عدليې وزير وروستيو څرګندونو ته په اشارې ليکلي، چې دومره ژر خو ماشوم هم له خبرو نه اوړي. « د اساسي قانون تشه نوره څنګه وي؟ خو افغانستان اساسي قانون نه لري. پخپله دې اول ويل د تېر شاهي نظام اساسي قانون نافذوو ، بيا دې ويل دې چي کار پرې روان دی ، نن وايې چي قران او سنت شته همدا اساسي قانون دی. دومره ژر خو به يو ماشوم له خبرو وانه وړي.»
حکمتيار له شرعي څخه پوښتلي، چې که قران د طالبانو اساسي قانون وي نو په کوم ځای کې لیکل شوي، چې « رییس الوزرا به درې مرستيالان لري؟ پايتخت به کابل وي او ته به وزير يې؟»
نوموړی د پېغور په ډول د طالبانو عدليې وزير ته ليکي، چې له خپلو ملګرو يې زده کړه، چې درې کاله د نجونو د ښوونځيو په طرحه اخته دي او لا نه ده جوړه شوې.
حبیب الرحمان ويلي، چې د طالبانو د همدې تنګ نظريو له امله خلګ په «اسلام ملنډې وهي» او ځوانان سيکولرزم ته روان دي.
د طالبانو د عدليې د وزير او د ګلبدين حکمتيار د زوی يو پر بل انتقادونه هغه مهال زيات شول، کله چې تېره ورځ د طالبانو عدليې وزير د حزب اسلامي ګوند مشر حکمتيار ته په خطاب کې وويل، چې «له کور د ايستلو په موضوع کې مو ستاسو احترام کړی او که دا بې احترامي بولې نو ته عقل نه لرې.»
تر همدې خبرو سم دستي وروسته حبیب الرحمان حکمتيار پر اېکس پاڼه ولیکل، «دا د افغانانو بدبختي ده، چې واړه خلګ پر لويو چوکيو ناست او ولس ته د فتح شوي ملت په سترګه ګوري.»
