د طالبانو د ټولګټو چارو وزارت مسولان وايي، د شمالي ولایتونو عمومي لاره چې په سالنګونو کې د واورې د ډېر ورښت له امله تېره شپه تړل شوې وه نن سهار درې بجې د مساپر وړونکو او باروړونکو موټرو پر مخ پرانیستل شوه.
د طالبانو د ټولګټو چارو وزارت ویاند محمد اشرف حق شناس د یک شنبې په ورځ د (وري ۱۱مه) په خپله اېکس پاڼه لیکلي: «د سالنګونو لاره چې تېره شپه اووه بجې د واورې د زیات ورښت او توپان له امله تړل شوې وه، نن سهار نږدې درې بجې د مساپر وړونکو او باروړونکو موټرو پر مخ خلاصه شوه.»
د سالنګونو د ساتني ریاست یو مسول چې د یاد وزارت له لوري یې نوم نه دی ذکر شوی په یو ویډیويي کلیپ کې وايي، د واورې د زیات ورښت او توپان له امله یې په واوره کې له دوو سوو ډېر موټرونه ژغورلي دي.
دغه کس وايي: «تېره شپه اووه بجې د سالنګ په پل خاکي سیمه کې د واورې ډیر شدید توپان رامنځته شو چې له امله یې لاره وتړل شوه، د واورې د توپان په منځ کې شاوخوا ۲۵۰ موټرونه بند شوي وو، د سالنګونو د ساتنې د کارکوونکو له لوري وژغورل شول.»
د تولګټو چارو وزارت پر یاده لاره له تلوونکو مساپرو څخه غوښتنه کوي چې د سفر پر مهال د ځان ساتني په موخه ژمني توکي له ځان سره ولري.
دا په داسې حال کې ده چې له ژمي وړاندې طالبانو د سالنګونو لاره چې د افغانستان یو شمېر شمالي ولایتونو له پلازمېنه کابل او مرکزي ولايتونو سره نښلوي د وارو د زیات ورښت پرمهال د ویجاړو شویو سیمو د رغېدو اعلان کړی و، خو لاهم د افغانستان د شمالي ولایتونو دغه مهمه لاره د واورو د ورښت پر مهال د سفر لپاره امن نه ده.
