د افغانستان د خبریالانو مرکز پنځه تنه خبریالان د ۱۴۰۲ کال « د غوره خبریالانو» په توګه نومولي دي. د رخشانې رسنۍ څخه طاهر احمدي، له طلوعنیوز څخه فریدالله محمدي، میترا مجیدي او نصیراحمد صالحي او د هشت صبح ورځپاڼې څخه امین کاوه د سږني کال د جایزو ګټونکي اعلان شوي.
د خبریالانو د ملاتړ دغه مرکز د جمعې په ورځ د (وري ۱۷مه) د بلجیم په پلازمېنه بروکسل کې د «کال د غوره خبریال» جایزه اعلان کړه.
د دغه مرکز اجرایوي مشر احمد قریشي ویلي، چې په دغو سیالیو کې له ۴۰ زیاتو ملي او سیمهییزو رسنیو برخه لرله.
د ښاغلي قریشي په وینا، د ارزولو پلاوي د ګډونوالو ټول راپورونه ارزولي او تر ارزولو وروسته یې په ګډه پرېکړه کړې.
هغه زیاته کړه، چې دغو سیالیو ته د نوماندو راپورونو په ډله کې د هشت صبح ورځپاڼې د خبریال امین کاوه راپور چې د عزیزي بانک د مشر او د بانک د یوه پېرېدونکي تر منځ د ولاړې شوې لانجې پر سر جوړ شوی و او دا رنګه د رخشانې رسنۍ د خبریال طاهر احمدي راپور چې په پاکستان کې یې د افغان کډوالو په اړه جوړ کړی و جایزې ترلاسه کړې.
د دغې جایزې نور ګټونکي د طلوعنیوز خبریالې میترا مجیدي راپور چې د ماشومانو پر کار کولو یې جوړ کړی و، د دغې شبکې د بل خبریال نصیر احمد صالحي راپور چې په فراه ولایت کې یې د اوبو د کمي په اړه و او د فرید الله محمدي مرکه د دغو جایزو ګټونکې شوه.
په افغانستان کې د کال د غوره خبریال جایزه د تېرو لسو کالو را په دې خوا د خبریال د ملي ورځې په ویاړ ورکول کېږي. تېر کال د افغانستان انټرنشنل خبریال عارف یعقوبي هم ورته جایزه ګټلې وه.
په افغانستان کې خبریالان او رسنۍ په تېرو درېیو کالو کې د طالبانو تر سخت سانسور او بندیزونو لاندې کار کوي او د هرې ورځې په تېرېدو سره پر دوی نوي بندیزونه لګول کېږي، خبریالان ځورول کېږي او ان د زندانونو د تورو تمبو تر شا استول کېږي.
