د طالبانو مشر په خپل اختریز پیغام کې یوځلې بیا د شرعي حدودو پر نافذولو ټینګار کړی
د طالبانو د ډلې مشر په خپل اختریز پیغام کې یو ځلې بیا د شرعي حدودو پر پلې کولو ټینګار کړی او هغه یې د ظلم په مخنیوي کې د مظلومانو د ملاتړ غوره بېلګه یاده کړې ده.
د طالبانو د ډلې مشر په خپل اختریز پیغام کې یو ځلې بیا د شرعي حدودو پر پلې کولو ټینګار کړی او هغه یې د ظلم په مخنیوي کې د مظلومانو د ملاتړ غوره بېلګه یاده کړې ده.
هغه دا رنګه په افغانستان کې د امربالمعروف وزارت په ترسره شویو چارو خوښي ښکاره کړې او هغه یې له منکراتو څخه د مخنیوي او نیکو چارو ته د خلکو د هڅونې لپاره ښه مثال بللی او نورو ولسوالیو او لرې پرتو سیمو ته یې هم د دغه وزارت د څانګو او د عالمانو د شوراګانو په پراخولو ټینګار کړی.
ملا هبت الله په دغه اختریز پیغام کې د افغانستان د خلکو اوسني بد اقتصادي وضعیت ته په اشارې سره ویلي، چې دوی د اسلامي شریعت په اډانه کې داسې تګلارې په پام کې لري چې خلک وتوانېږي پر خپل مټ ځانته حلاله روزي پیدا کړي؛ خو په دې اړه یې زیات معلومات نه دي ورکړي.
هغه همدومره ویلي، داسې عام المنفعه شرکتونه به رامنځته کړي چې خلکو ته د نفقې برابرولو زمینه برابره شي؛ خو دا چې دغه شرکتونه به څوک، څنګه او کله جوړوي په دې اړه یې وضاحت نه دی ورکړی.
ملا هبت الله په دغه اختریز پیغام کې له نړۍوالو سره د ښو اړیکو په اړه هم رڼا اچولې او ویلي یې دي، چې د سیمې له ټولو هېوادونو سره د متوازن او اقتصاد محوره سیاست په چوکاټ کې پرمخ ځي، له ټولو هېوادونو سره ښې سفارتي او اقتصادي اړیکې غواړي او له هغوی یې هم غوښتنه دا ده، چې د همکاریو په روحیه ولاړه تګلاره ورسره خپله کړي.
ملا هبت الله په دغه پیغام کې د فلسطین موضوع ته هم اشاره کړې او ویلي یې دي چې: د فلسطین قضیه د ټول اسلامي امت قضیه ده. موږ پر غزه باندې اسرایيلي تجاوز او اشغال یوځل بیا په کلکه غندو، له ټولو اسلامي هېوادونو حتی له ټولې نړۍ څخه غواړو، چې ژر تر ژره دې د اسراییلي اشغالګرو د ظلم مخه ونیسي.
هغه په افغانستان کې د کوکنارو د کښت په اړه لګول شوی بندیز د خپلو لاسته راوړنو په سر کې یاد کړی او ډاډ یې څرګند کړی، چې نور به افغانستان د تل لپاره له دغه بوټي پاک شي.
نوموړي د دغه اوږد اختریز پیغام په پای کې طالبانو ته ۱۷ سپارښتنې هم کړې دي.
هغه له طالبانو غوښتي، چې د شریعت په نافذولو کې دې رغنده ونډه واخلي، له خلکو سره دې ښه چال چلند وکړي، بېګناه خلک دې نه ازاروي، پر څوکیو د ګومارلو پر مهال دې نه خوشالیږي او په لرې کولو دې نه خپه کېږي، د خلکو د چوپړ لپاره دې هر مهال چمتو واوسي او له تېرو نظامونو دې عبرت واخلي، چې وایي هیڅ نظام په ظلمونو پایښت نه شي موندلی.
خو په ټول دغه اوږده پیغام کې ملا هبت الله د زدهکړو په اړه لږ تم شوی او ویلي یې دي، چې د پوهنې وزارت په اډانه کې د عصري او دیني علومو لپاره ستر تشکیلات جوړ شوي او د یتیمانو د زدهکړو په اړه یې د چارواکو د زیاتې پاملرنې غوښتنه کړې.
نوموړي د نجونو پر زدهکړو او د ښځو کار کولو ته هیڅ ډول اشاره نه ده کړې او له دغو برخو څه نا څه په څنګ تېر شوی.
د افغانستان ګڼ خلک په تېره بیا نجونې او مېرمنې هر کال په دغسې مناسبتي ورځو کې د ښو خبرونو او نویو زېرو په تمه وي؛ خو تر اوسه یې داسې کوم نوی زېری نه دی اورېدلی، چې د هغوی زړونه پرې اوبه وڅښي.
