د امریکا د استازو مجلس د بهرنیو اړیکو د کمېټې مشر مایکل مکال د چهارشنبې په ورځ یو ځل بیا په افغانستان کې د بشري ناورین او د طالبانو له خوا د امریکا له بهرنیو مرستو څخه په ناوړه استفادې نیوکه وکړه.
هغه وویل، چې د افغانستان اوسنی بحران له دغه هېواد څخه د امریکا د وتلو نتیجه ده.
مکال وویل ،چې د امریکا بشري مرستې افغانستان خلکو او په ځانګړي ډول مېرمنو او ماشومانو ته نه رسیږي او پر ځای یې د طالبانو لسونو ته لوېږي.
د مکال په وینا: "موږ په حقیقت پوهیږو چې د امریکایي مالیه ورکونکو مرستې د طالبانو او د هغوی د متحدینو جیبونو ته ځي."
د امریکا د استازو جرګې د بهرنیو اړیکو کمېټې د چهارشنبې په ورځ د امریکا د نړۍوالې مرستندویه ادارې (USAID) د مشرې سمانتا پاور په حضور کې غونډه وکړه.
په دې کتنه کې مېرمن پاور په بېلابېلو هېوادونو کې د امريکا د بشري او پراختيايي مرستو د اغېزمنتيا په اړه د استازو پوښتنو ته ځوابونه وويل.
مکال وویل: "د بایډن د ادارې تر څارنې لاندې د امریکايي ځواکونو ګډوډ وتل په افغانستان کې یو لوی بشري ناورین رامنځته کړی دی."
هغه زیاته کړه، چې د بشري حقونو او د ښځو د حقونو په برخه کې د افغانستان لاسته راوړنې د بایډن په یو اړخیزه توګه له افغانستان څخه د وتلو له پرېکړې سره له لاسه ورکړل شوې او "اوس افغانستان په نړۍ کې د ښځو لپاره یو تر ټولو ځورونکی رژیم لري."
امریکا په تېرو دوو کلونو کې له افغانستان سره څه باندې دوه میلیارده ډالره مرسته کړې ده.
ښاغلی مکال د امریکا په کانګرس کې یو له هغو غړو دی، چې همېشه یې د افغانستان په تړاو د بایډن د ادارې پر سیاستونو نیوکې کړې دي.
